Primeiru-Ministru, Taur Matan Ruak, prezide Reuniaun Konsellu Ministru iha CCD. Imajen Tatoli/Egas Cristovão

DILI, 28 marsu 2020 (TATOLI) – Konsellu Ministru aprova Projetu Dekretu Governu, ne’ebé aprezenta husi Primeiru-Ministru, Taur Matan Ruak, kona-ba medida ezekusaun deklarasaun Estadu Emerjénsia atu luta kontra Coronavírus ka COVID-19.

Governu aprova Dekretu Governu ne’e tanba konsidera hanesan pandemia ida no adota ona konjuntu ida ba medida preventiva.

Liuhosi esforsu ne’ebé hala’o ona no medida aprovasaun sira ne’ebé mak implementa, iha loron-14 marsu liubá, Ministériu Saúde anúnsia kazu dahuluk husi teste pozitivu COVID-19.

Ho hanoin ida ne’e, Konsellu Ministru aprova Dekretu-Lei hodi haforsa no ezekuta medida foun, ho hanoin atu hemenus risku propagasaun husi SARS-Cov2 iha populasaun ne’ebé hela iha Timor-Leste.

Nune’e, Governu husu ba Prezidente Repúblika atu dekreta Estadu Emerjénsia.

Notísia Relevante: PR Lú-Olo Dekreta Ona Estadu Emerjénsia Hodi Prevene COVID-19

Husi deklarasaun Estadu Emerjénsia, Governu liuhosi Dekretu ida ne’e atu asegura ba ninia ezekusaun no adota medida nesesária sira hodi bele prevene moras kontein pandemia.

“Atu salva ema-nia vida no asegura subsisténsia hodi labele hamate fali importasaun ba sasán no servisu esensiál sira ba ita-nia populasaun tomak, maske Governu tenke limita direitu liberdade fundamentál balun”, refere nota husi ezekutivu, ne’ebé Agência Tatoli asesu, sábadu ne’e.

Estadu Emerjénsia hahú entre oras 00:00 loron 28 marsu no sei ramata iha oras 23:59 iha loron 26 abríl 2020 no ida ne’e aplika ba territóriu nasionál tomak.

Medida ne’ebé mak aprova bazeia ba limite konstitusionál sira no tuir orientasaun husi Organizasaun Mundiál Saúde (OMS) iha ezemplu   husi nasaun sira seluk mós no buka atu hamenus propagasaun ba kazu foun husi COVID-19 iha Timor-Leste.

“Estadu Emerjénsia ne’e regra rua mak importante iha ne’ebá maka intervesaun atu ema li’ur labele tama no ida mak ita tenke mantein distánsia sosiál no movimentasaun transporte iha rai-laran no sei limita hotu, maibé fó autorizasaun sé iha kazu espesiál liuliu fronteira, aeroportu no portu, maibé kuandu ita-nia ema mai tantu husi rai-li’ur ho aviaun ita tenke simu,” tenik Ministru Defeza no Seguransa, Filomeno da Paixão de Jesus, hafoin reuniaun ezekutivu estraordinária iha Sentru Konvensaun Dili (CCD, sigla portugés), sábadu ne’e.

Tuir informasaun ne’ebé Agência Tatoli rekolla liuhosi rede sosiál Ministru Reforma Lejizlativa no asuntu Parlamentár, Fidelis Manuel Leite Magalhães, regra Estadu Emerjénsia ne’e sei autoriza vendedór ambulante, loja no merkadu sira fa’an nesesidade báziku atu loke, maibé tenke impoin regra hanesan fase liman, distánsia kada ema ho metru ida, labele tama ka hein nadodon, tenke tau máskara maibé regra jerál maka tenke asegura rekezitu no prokupasaun ijine nian.

Alende ne’e, regra ne’e la autoriza atu sidadaun pasiar ba loja sira ka dada-lia iha loja sira.

Hola tiha sasán tenke fila kedan ba uma no labele ba merkadu ho grupu.

Nune’e mós, ba transporte públiku sira sei suspende hotu, jogu desportivu, festa no ransu grupu sei para hotu, inklui mate-uma sira mós másimu ema na’in-10 de’it.

Entretantu, ekipa Interministérial sei avaliasaun ba regra sira ne’e hotu.

Antes ne’e, Prezidente Repúblika, Francisco Guterres Lú Olo, dekreta ona Estadu Emerjénsia hafoin Parlamentu Nasionál deside a-favór ho uninamidade hodi fó autorizasaun ba Xefe Estadu dekreta, nune’e bele prevene nasaun no povu husi COVID-19.

Notísia Relevante: PN Autoriza PR Dekreta Estadu Emérjensia

Estadu Emerjénsia ne’e, sei limita ita-nia ditreitu balun, liberedade, garantia balun ne’ebé konstituisaun fó dalan ba sidadaun ida-idak no ba hatu-hotu, maibé la’ós atu halakon no suspende ka limita maibé atu defende interese boot li maka povu-nia vida.

Xefe Estadu afirma, ho Estadu Emerjénsia ne’e atividade balun husi populasaun sei hapara no balun seuk sei la’o atu garante sidadaun nia moris loron-loron, enkuantu Governu bele proíbe reuniaun no manifestasaun ka eventu sosiál,  limita sirkulasaun ema nian no atividade ne’ebé envolve ema barak tana risku b kontájiu husi ema ba ema.

Aliende ne’e, PR Lú Olo husu ba partidu polítiku, lider nasionál, kuadru no militante hotu atu tau ses diferensa polítika, hodi fó liman ba malu nu’udar meiu atu kombate hasoru moras aat hanesan COVID-19.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here