Primeiru-Ministru, Taur Matan Ruak, konvoka enkontru hodi estabelese Komisaun Jestaun Krize iha CCD. Imajen/Mídia-GPM

DILI, 28 marsu  2020 (TATOLI) – Primeiru- Ministru (PM), Taur Matan Ruak, hala’o enkontru dahuluk ho Ekipa Jestaun Krize hodi hahú halo preparasaun ba estabelesimentu Jestaun Krize,  atu halo jestaun durante implementasaun Estadu Emerjénsia hodi luta kontra Coronavírus ka COVID-19.

Enkontru Ekipa Jestaun Krize ne’e lidera husi Xefe Governu iha Sentru Konvesaun Dili (CCD,siglá Portugés).

Tuir nota ne’ebé Agência Tatoli asesu iha pájina Gabinete Primeiru-Ministru (GPM), Ekipa Jestaun Krize estabelese ho objetivu durante períodu Estadu Emerjénsia, kontrolu tomak sei mai hosi komandu ida de’it no informasaun hotu-hotu mós sei sentralizadu no kontrolu ba sirkulasaun atividade hotu-hotu.

Ekipa Jestaun Krize ne’e sei hahú serbisu efetivu bainhira Dekretu Governu kona-ba regulasaun Estadu Emerjénsia Aprovadu iha Konsellu Ministru.

Durante Estadu Emerjénsia ne’e  mós, Xefe Governu sei asume responsabilidade ba Komisaun Interministeriál ne’ebé durante ne’e lidera hosi Ministra Saúde Interina, Elia Antonio de Araujo dos Reis Amaral.

Ministru Defeza no Seguransa, Filomeno da Paixão de Jesus, informa ekipa jestaun krize ne’e, ohin PM Taur maka deside harii.

“Ekipa Jestaun Krize ne’e kria husi Primeiru-Ministru no lidera rasik husi Primeiru-Ministru durante períodu Estadu Emerjénsia,” tenik Ministru Filomeno Iha CCD, sábadu ne’e.

Ho nune’e Ministru ne’e dehan, Ekipa Jestaun Krize ne’e hahú aban sei iha enkontru ho liña ministériál hodi jere servisu.

“Servisu ne’e sei fahe direitamente husi Primeiru-Ministru”, nia afirma.

Hola parte iha enkontru Jestaun krize ne’e maka hanesan Minsitru Defeza no Ministru Interior Interinu, Filomeno da Paixão de Jesus, Xefe  Estadu Maior FALINTIL-Forsa Defeza Timor-Leste (F-FDTL), Koronel Calisto dos Santos “Koliate” no ofisiál F-FDTL sira seluk.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here