Diretora Jerál Prestasaun Saúde, Odete Viegas da Silva. Imajen/Felicidade Ximenes

DILI, 28 marsu 2020 (TATOLI) – Governu liuhosi ekipa task force liña ministeriál ne’ebé lidera hosi Ministériu Saúde, daudaun ne’e, diskute hela atu estabelese sentru mídia ba prevensaun pandemia Coronavirus ka COVID-19.

Notísia Relevante : AJTL-TLPU Husu Governu Kria Sentru Mídia Ba COVID-19

Diretora Jerál Prestasaun Saúde, Odete Viegas da Silva, ohin, informa, objetivu estabelese sentru mídia ne’e atu apoiu servisu ekipa traballu COVID-19 hodi fornese informasaun atuál no apartadu ba komunidade  iha territóriu nasionál kona-ba situasaun pandemia COVID-19 iha Timor-Leste.

Odete Viegas da Silva hatutan, Sentru Mídia ne’e sei fasilita órgaun komunikasaun sosiál privadu no estatál nasionál no internasionál bele hetan informasaun ho rigor no balansu kona-ba situasaun hotu ne’ebé akontese iha ámbitu luta kontra pandemia COVID-19.

“Ekipa-sira sei diskute ona halo preparasaun no iha ona progresu. Iha segunda (30/03/2020), posivel bele lansa ofisiál ona,” informa Odete Viegas da Silva, ba Ajénsia Tatoli iha edifísiu Ministériu Saúde, Palásiu Sinzas, Caicoli, Dili.

Nia informa mós katak, Sekretáriu Estadu Komunikasaun Sosiál (SEKOMS) envolve direita mós iha ekipa sentru mídia ne’e.

Notísia Relevante : KI Husu Governu atu Hamosu Portokolu Medida Prevensaun ba Jornalista Sira

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here