Vise-Ministra ba Kuidadu Saúde Primáriu, Élia António de Araújo dos Reis Amaral. Imajen/Egas Cristovão

DILI, 28 marsu 2020 (TATOLI)-Governu liuhhosi Ministériu Saúde garante sei kontratu otél sira hotu iha Dili hodi sai fatin kuarentena ba ema barak bainhira iha nesesidade iha futuru.

Vise Ministra Kuidadu Saúde Primária, Élia dos Reis Amaral, hateten movimentu sidadaun sira hosi rai li’úr liuhosi Fronteira Terrestre no Aeroportu kontinua la’o tanba ne’e governu iha kapasidade atu kontratu tan otél Sira hodi sai fatin kuarentena.

Dadaun ne’e MS kontratu ona Otél Audian, Otél Novo Horizonte Metiaút Dili, D’City Villa-Verde no hodi akumula Timoroan no estranjeiru durante loron 14 hodi prevene coronavirus ka COVID-19.

“Hanesan aban mós sidadaun sira kontinua mai Timor-Leste tanba ne’e mak ita sei uza hotu otél sira iha Dili laran hodi sai fatin kuarentena,”informa Vise Ministra, Élia dos Reis Amaral ba jornalista sira iha Sentru Konvensaun Dili, (CCD-sigla portugés).

Governu oras ne’e haree hela verba orsamentu balun atu uza hodi aluga otél sira bainhira númeru ema ne’ebé hela iha kuarentena aumenta tan.

Entretantu, Ministériu Saúde ho ekipa Task Force sira antes ne’e estabelese ona fatin kuarentena iha INAP Comoro Dili, Kuarentena Tibar, Munisípiu Liquiça.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here