Primeiru-Ministru, Taur Matan Ruak, prezide Reuniaun Konsellu Ministru iha CCD. Imajen Tatoli/Egas Cristovão

DILI, 28 marsu 2020 (TATOLI) – Ministru Transporte no Komunikasaun, José Agostinho da Silva, hateten atu kumpre Estadu Emerjénsia maka Governu liuhosi rezolusaun ida deside hodi aplika regra ne’ebé suspende atividade provizóriu movimentu aéreu, marítima no terrestre nian.

“Transporte aéreu ba atendimentu komersiál ita bele hapara temporáriamente. Aviaun sira halo movimentu dei’t ba kestaun emerjénsia, hanesan transporta ekipamentu médiku, ai-moruk mai iha Timor-Leste, tantu karik lori ai-moruk sira husi rai-li’ur mai no asuntu sira ne’ebé ligadu ho COVID-19, tanba ida-ne’e konsidera asuntu emerjénsia bele la’o nafatin”, dehan Ministru José Agostinho ba Agência Tatoli, hafoin ramata reuniaun Konsellu Ministru Estraordinária iha Sentru Konvensaun Dili (CCD, sigla portugés), sábadu ne’e.

Governante ne’e realsa, sidadaun sira esforsu atu kumpre rezolusaun ida-ne’e ho Dekretu Governu nian, nune’e bele prevene Coronavírus alastra iha Timor-Leste.

Kona-ba transporte marítima, hahú horsehik Autoridade Portuáriu sira hahú hapara ona sira-ninia atividade no la halo viajen atu tula pasajeiru husi Oé-cusse no Ataúro.

“Komesa horisehik hapara ona temporáriamente hodi haree situasaun rai-laran relasiona pandemia COVID-19. Maibé ró sira ne’ebé maka lori sasán nesesidade báziku sira husi rai-li’ur ne’e iha rezolusaun ohin temi sei autoriza ita-nia ró ne’ebé maka lori sasán maibé tenke tuir regra ho situsaun ida-ne’e sira iha de’it tasi-laran maka ita bá foti. Sira labele tun mai, tanba ita organiza oinsá maka bele bá foti hodi trasporta fali nesesidade ba ita-nia rai-laran”, José Agostinho subliña.

Enkuantu, kona-ba transporte terrestre rasik, liuliu ba transporte públiku no privadu, ida-ne’e mós hanesan sei hapara provizoriamente.

Inisiativa ne’e, tanba atu evita distánsia sosiál tanba kuandu movimentasaun ne’e la’o, ida-ne’e fásil atu vírus bele da’et ba ema seluk.

“Entaun ohin iha Rezolusaun Governu, ida-ne’e mós iha oinsá maka iha distánsia sosiál, katak ita ho ita tenke iha metru ida no ida-ne’e sei implementa maibé bainhira transporte públiku sei la’o maka pasajeiru sira kuandu iha karreta laran distánsia metru ida-ne’e difísil”, nia akresenta.

Nia hatutan: “Iha rai-li’ur de’it, ezemplu agora mós distánsia metru ida ne’e ita viola hela, kuantumais iha karreta laran. Entaun ha’u hanoin ba transporte públiku ita bele hapara temporáriamente ba semana-rua ka tolu, atu ita bele haree no fó espasu, nune’e ita bele iha kondisaun no situsaun hasoru moras Coronavírus ninia dinámika ne’e oinsá”, Ministru reforsa.

Tanba ne’e, nia husu atu parte hotu tenke kolabora ho Instituisaun Governu hotu, inklui individu ida-idak tenke koopera ho buat ne’ebé Governu fó-sai ona tanba situsaun agora liga ho COVID-19 ne’e hanesan ameasa ba saúde públika.

Nune’e, Ministru ne’e husu ba Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), kuandu ema balun la koopera instituisaun rua ne’e tenke asegura.

Aleinde ne’e, governante ne’e adianta, tenke asegura nafatin komunikasaun, atu nune’e fasilita populasaun karik iha sintoma Coronavírus maka bele kontaktu ba númeru telemóvel ne’ebé Governu estabelese ona 119 ho gratuita.

“Ministeriu Transporte no Komunikasaun halibur ona ita-nian operadór telekomunikasaun tolu hanesan Timor Telecom, Telemor no Telekomcel, atu kria liña emerjénsia ho númeru 119. Ida-ne’e espesialmente estabelese ba kazu COVID-19 no husu ba komunidade karik iha informasaun emerjénsia bele liga ba númeru refere, hodi bele relata no hetan tulun lalais husi parte médiku sira”, Jose Agostinho akresenta.

Jornalista: Natalino Costa
Editora: Julia Chatarina

HAKEREK NO HATÁN

Please enter your comment!
Please enter your name here