Imajen Espesiál.

DILI, 28 marsu 2020 (TATOLI)—Iha sábadu (28 marsu 2020) ne’e, Dili hakmatek. Husi lidun ba lidun. Husi sikun ba sikun. Husi bairru ida ba bairru seluk, haree Dili hanesan rai luan ida be nonook lian laek. Maski lian karik ba, lian sira ne’e la halo Dili barullu hanesan loron baibain.

Dili hakmatek hodi kontra hasoru COVID-19. Populasaun Dili hakruuk ba Estadu Emerjénsia ne’ebé Xefe Estadu Timor-Leste, Francisco Guterres “Lu Olo”, dekreta iha sesta (27/3/2020) horisehik.

Maski iha populasaun balun ne’ebé labele kontra nia-an rasik hodi kontra COVID-19 hodi bibi-ain la’o iha Dili laran, maibé populasaun ua’in mak kontra nia-an rasik hodi hakmatek iha uma. Tanba, sira sente katak propagasaun COVID-19 ne’e hanesan inimigu raan-malirin ida ne’ebé bele halo ema bulelu no bele oho ema.

Movimentu ema-nian menus. La hanesan loron horisehik no horisehik liu ba ne’e. Baibain, Dili nakonu ho ema ua’in nia ulun. Nakonu ho karreta no motor. Ne’ebé, ema oin-oin ho karreta-motor marka rebo-rebo be halo Sidade Dili rame be rame. Ohin, Dili monok no hakmatek

Ohin, relasiona ho Estadu Emerjénsia ne’ebé dekreta hosi Prezidente-Repúblika, Francisco Guterres ‘Lú Olo’ halo movimentu ema no transporte públiku sira iha Kapitál Dili, bele sura ho liman. Dili hakmatek be hakmatek.

Tuir Ajénsia TATOLI nia aobservasaun transporte públiku diresaun Comoro no Bidau (010, 03), haree hetan de’it bemo rua ka tolu de’it. Transporte diresaun refere iha pasajeiru la barak hanesan bainbain. Tanba, dalaruma, iha bemo ida-nia laran, iha de’it ema na’in-ida no rua de’it mak tuur iha laran. Karik, ida ne’e mak hanaran “distánsia sosiál” ka “sosiál distánsia”.

Nune’e mós diresaun Becora-Merkadu Lama (Sentru Konvensaun Dili), mikrolte (01, 02) bemo ida-de’it mak movimenta tun-sa’e. Maibé, hahú hosi tuku 12:00 ba leten, mikrolete refere sei la buka ona pasajeiru.

Hateke hikas ba transporte diresaun Manleuana-Taibessi (05), la iha mikrolete ida mak buka pasajeirus. La seluk la leet, mikrolete diresaun Ailok Laran ba Taibessi (07) mós la movimenta hanesan loron baibain. Luron mamuk be mamuk.

Haree ba mai, bazeia ba observasaun ne’ebé Ajénsia TATOLI halo iha tuku 10:00 dadeersan to’o iha biban ne’e, mikrolete diresaun Taibessi ba Bidau (04) mós la halo movimentu. Entretantu, Diresaun Delta-Audian (06) mós la halai. Imajen ne’ebé mosu, maioria transporte públiku iha Sidade Dili, la halo movimentasaun.

“Ami sei halai hela maibé bemo ida ka rua de’it mak halai. Kolega sira seluk ne’e deside lakohi halai. Ha’u deside halai ne’e atu koko haree situasaun ne’e ema sei la’o ba la’o mai ka lae. Maibé, lorokraik ha’u la halai ona tanba ema dehan moras ne’e perigu ne’e mak estadu deside emerjénsia ne’e. Maun ko’alia mós ha’u ba ona,” Kondutór Diresaun Bekora-Merkadu Lama, Armando de Jesus, dada-lia ho Ajénsia TATOLI, iha estátua Francisco Xavier do Amaral, sábadu ne’e.

Imajen Espesiál.

Maibé, iha parte seluk, Timor Plaza ne’ebé sai sentru negósiu, nia odamatan loke luan be luan. Iha ne’eba, ema ua’in sei la’o ba mai de’it. Traballadór sira ne’ebé serbisu iha Timor Plaza, sei hala’o serbisu hanesan baibain, liuliu seguransa sira.

Iha fali sentru negósiu iha Colmera, loja ua’in maioria taka. Maibé, iha sikun balun, loja balun ne’ebé fa’an sasán eletrónika loke hela hodi halo negósiu. Loja seluk, iha loja ne’e sorin-sorin, maioria nia odamatan xave metin.

Maibé, iha biban seluk, atu haree ba regra sira ba Estadu Emerjénsia ne’ebé Prezidente Repúblika dekreta iha loron horisehik, daudaun ne’e reuniuan koletiva Konsellu-Ministru ne’ebé dirije hosi Primeiru-Ministru, Taur Matan Ruak, sei deskuti regra ba estadu emerjénsia ne’e.

No, atu haklaken tutan rezultadu reuniaun koletiva ida ne’e ba públiku sira, jornalista sira mak hamriik iha liña oin, hodi movimenta no hein hela rezultadu enkontru ne’e ho laran tomak.

Jornalista : Evarsito Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here