Otél Golgota, Rai-kotu. Imajen/booking.com

DILI, 28 marsu 2020 (TATOLI) – Dirijente Otél Golgota no Restaurante, Mimi Chungue, hateten relasiona ho COVID-19, ne’ebé sirkula iha nasaun barak inklui Timor-Leste, maka parte otél foti desizaun suspende provizóriamente sira ninia funsionáriu hodi deskansa iha uma, nune’e bele prevene moras ne’e.

“Ami iha ne’e totál funsionáriu hamutuk 50, maibé tanba Coronavírus entaun ami tenke pasiénsia no deside suspede provizóriu hodi ami-nia funsionáriu balun deskansa ho família, nune’e bele hamutuk ho sira nia família hodi kontrola sira prevene Coronavírus”, dehan responsável ne’e ba Agência Tatoli, iha ninia knaar fatin, Otél Golgota, Rai-Kotu, sábadu ne’e.

Nia dehan, daudaun ne’e funisionáriu ne’ebé maka servisu hodi ajuda ba funionamentu iha Otél Golgota no Restaurante kompostu husi funsionáriu joven sira de’it.

“Sira ne’ebé maka agora daudaun sei ajuda hodi servisu ho ami iha ne’e hela na’in-12, kompostu husi funsionáriu na’in-10 no na’in-rua maka seguransa, maibé sira ne’e mesak ema joven no seidauk forma família”, akresenta Mimi Chungue.

Maske Otél Golgota halo ona suspensaun, maibé parte husi jerente Golgota Ótel la haluha hodi kontaktu no kotrola nafatin kondisaun sira nian traballadór ne’ebé sira suspende provizóriu.

“Ami haruka sira deskansa iha sira nia uma, tanba Coronavírus, atu prevene sira labele mai servisu tanba mai servisu maka sei fó impaktu ba sira nia oan no família sira iha uma. Ho nune’e ami halo kontaktu nafatin loron-loron ho sira no husu sira nia kondisaun”, nia salienta.

Nia refere liután kona-ba traballadór sira nia saláriu, sei kontinua normál no laiha problema.

“Sira kontinua iha fulan-ida ne’e simu saláriu normál no laiha problema, tanba ne’e suspensaun provizóriu atu prevene moras Coronavírus rasik, maibé ba oin ho situasaun ida  hanesan ne’e maka ami sei haree posibilidade seluk tanba menus rendimentu”, nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here