Governadór BCTL, Abraão de Vasconcelos. Imajen Tatoli/Antonio Goncalves

DILI, 27 marsu 2020 (TATOLI)—Governadór Banku Sentrál Timor-Leste (BCTL-sigla portugés), Abrão de Vasconcelos, propoin ba Parlamentu Nasionál (PN) atu foti desizaun ‘inkestionavál nune’e fó autorizasaun ba Governu foti osan ho montante boot hosi fundu mina-rai atua COVID-19.

Governadór BCTL ko’alia kestaun ne’e relasiona propagasaun COVID-19 halo ema barak iha mundu mate barak no situasaun ne’e halo Timor-Leste tama ona iha estadu emerjénsia ne’ebé deside lian-ida reprezentante povu sira sira konsiente katak iha situasaun ida-ne’e tenke trata ho urjente.

Nia afirma, haree ba situasaun nee’e la presiza hanoin fali dehan osan hira mak Timor-Leste atu uza hodi atua COVID-19 ne’e.

Governadór BCTL akresenta, se deputadu sira hatene no hanoin futuru Timor-Leste nian iha perigu nia laran, entaun rekursu saida de’it tenke mobiliza hodi garante “dehan ita-nia futuru la afeta makaas, mezmu kona ita mós la duun barak”.

“Ha’u dehan ba nai deputadu sira di’ak liu ita hola desizaun ida la duun loos iha momentu ida hanesan ne’e (situasaun COVID-19) duké ita foti desizaun tenke loos maibé to’o ikus ita sala. Signifika ita hola desizaun ida hasai orsamentu millaun $250 ka millaun $500 depois buat ida la akontese, di’ak liu ita halo hanesan ne’e duke ita nein hola desizaun derrepente buat ne’e mosu tiha mai entaun ne’e la ajuda ita kombate Coronavirus ne’e,” dehan Abrão de Vasconcelos, bainhira hamutuk ho Ministra Finansa Ein-Ezersísiu, Sara Lobo Brites, hala’o audiénsia ho Komisaun C ligadu ho pedidu urjénsia ba autorizasaun transferénsia estraordinária hosi fundu petrolíferu, iha plenária Parlamentu Nasionál, sesta ne’e.

Governadór BCTL rekomenda ideia ne’e nune’e Timor-Leste labele sente arrepende bainhira COVID-19 mosu duni tanba Timor-Leste sei la sees hosi situasaun ida-ne’e.

Governadór BCTL ne’e promete bainhira reprezentante povu sira hola desizaun nune’e BCTL prontu kontribui hodi antesipa COVID-19 ne’e.

Nia dehan, millaun $250 ne’e atu finansia rejime duodesimál to’o peródiu oin-mai no ida-ne’e la kobre espesífiku ba situasaun COVID-19 ne’e.

Governadór BCTL ne’e hateten, orsamentu ne’e mós la’ós haree de’it ba COVID-19 maibé haree mós ba situasaun sira seluk hanesan setór privadu no sira-ne’ebé merese hetan tulun.

“Ita boot sira mós hanesan, se empreza taka tiha, kuandu taka la halo serbisu entaun empreza la selu. Ida-ne’e afeta la’ós de’it ba empreza ne’e maibé afeta mós ba ema ne’ebé serbisu ne’e ninia uma-laran. Ne’ebé, ha’u dehan di’ak liu ita hola desizaun foti osan mai mak buat ida virus ne’e la akontese la iha buat ida duke ita la halo derrepente buat ne’e mosu ita hakfodak, ita book an la di’ak ona,” Governadór BCTL ne’e fó hanoin ba reprezentante povu sira.

Tuir nia, atu antesipa propagasaun COVID-19, parlamentu tenke hola desizaun maske kontra lei tanba virus ne’e kuandu tama ema mate barak.

“Se lei ida dehan labele halo sasán ida, se agora ita mai iha fatin ida halo lei ne’e (Parlamentu Nasionál), nia bele muda sasán ida entaun ita ko’alia hamutuk hodi haree kestaun sériu ida-ne’e,” nia dehan.

Entretantu Deputadu Bankada Demokrátiku, Mariano Assanami “Sabino” konkorda ho rekomenadasaun BCTL nune’e Timor-Leste labele arrepende hasoru COVID-19.

“Loloos ne’e governu mak tenke esplika osan hirak presiza atu ba loos de’it Coronavirus. Se aban bainrua la ezekuta hotu bele tama fali ba kofre estadu tanba situasaun ida oras ne’e grave tanba ne’e mak ita tenke mobiliza hotu-hotu,” dehan Deputadu Assanami.

Maske nune’e, oras ne’e Parlamentu Nasionál foin mak halo audiénsia públika ho Ministériu Finansa kona-ba levantamentu fundu petrolífetu millaun $250 hodi finánsia rejime duodesimál maibé seidauk deskuti monatnte espesifíku atua COVID-19.

Notísia Relevante:  Fundu Minarai Lakon Billaun $1.8

Jornalista : Evaristo Soares Martins  

Editór      : Cancio Ximenes

HAKEREK NO HATÁN

Please enter your comment!
Please enter your name here