Baraka ne'ebé ekipa interministeriál prevensaun COVID-19, prepara iha Sentru Kuarentena Tibar. Imajen Tatoli/Cipriano Colo

DILI, 27 marsu 2020 (TATOLI)–Diretora Nasionál Atendementu Moras-Ministériu Saúde (DNAM-MS), Josefina Clarinha João konsidera kondisaun kuarentena Institutu Nasionál Administrasaun Públika (INAP) la seguru.

Tanba ne’e, nia esforsu halo ona kontaktu atu muda fali abitante timoroan 34 ne’e ba fali otél, maibé barak mak hakarak hela nafatin iha ne’ebá presiza de’it mak hadi’a no kompleta fasilidade iha fatin kuarentena ne’e.

“Ha’u halo ona esforsu tuir ezijénsia maluk sira iha kuarentena INAP ne’e. Ha’u tenta halo kontaktu ona ho na’in ba otél sira atu muda sira bá ne’ebá. Maibé, barak mak lakohi ho razaun hela besik iha área Comoro. Presiza de’it mak Governu tenke hadi’a no kompleta fasilidade iha kuarentena ne’e,” nia dehan ba Agência Tatoli iha kuarentna INAP, Comoro, sesta (27/03/2020).

Josefina akresenta, informasaun hotu nia aprezenta ona ba ekipa Task Force liña ministeriál sira atu toma responsalblidade hodi prevene saúde ba abitante sira-nian. Tanba, kondisaun ne’ebé nia rasik haree la merese atu hela.

“Ha’u hatene kondisaun iha fatin kuarentena ne’e la konduzivu tanba fasilidade ba maluk sira-ne’e la garante sira-nia kondisaun saúde. Tanba ne’e, ita iha ona dalan sei troka hotu fasilidade ne’ebé la merese ona tenke hasai hotu hodi tau fali foun”, nia tenik.

Ameta Mali Laet, abitante ne’ebé okupa mós karantena ne’e hateten to’o agora sira nafatin toba iha kondisaun hanesan de’it. Laiha mudansa. Kulisaun, sumasu manta, haris-fatin no sintina nafatin hela de’it. Sira sei uza hela fasilidade uluk nian ne’ebé dois no fo’er ona.

“Ami toba de’it iha kulisaun no uza sumasu no manta ne’ebé tau kleur ona iha ne’ebá. Fasiidade sira-ne’e iis rai-rahun de’it, depois giaun iha hariis-fatin no sintina inklui sabaun atu fase liman mós laiha, oinsá ami atu kuiadadu ijienie”, nia haktuir.

Abitante ne’e kestiona liután kona-ba matabisu no han kalan nian mós la tuir padraun. Dadeer han hudi ho budu de’it no kalan mak han etu ho modo. Maibé, tuku 17:00 sira lori ona mai. Tuir nia, loloos tenke iha hahán ne’ebé sufisiente atubele tahan ba kalan boot.

Jornalista: Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here