Tribunal Munisípiu Covalima. Imajen/Foti hosi kronolojía Facebook Nuno Saldanha

DILI, 27 marsu 2020 (TATOLI) – Tribunál Distritál Suai (TDS), kinta (26/03/2020), hola desizaun finál primeira instánsia, absolve ona arguidu na’in rua; João Babo (Indonéziu ) ho Caetano Mendes (Timoroan) hosi kazu hatama pistola rua (2) ho modelu AIR SOFT GUN liuhosi fronteira Batugade Indonézia mai Timor-Leste.

Notísia Relevante : TDS Altera Krime Kontra Bandu ba Arguidu Na’in Rua Hatama Pistola

Juis prosesu Samuel da Costa Pacheco mós aplika multa ba João Babo ho Caetano Mendes hodi selu kada loron $1.00 durante loron 120 ho total $120.00 no kustu judisiáriu $30.00.

Ministériu Públiku akuza arguidu na’in rua ho krime asosiasaun kriminoza, arma proibida no kontra bandu, ne’ebé previstu no punidu iha artigu 188 númeru 1, artigu 211, númeru 1, artigu 316, númeru 3 no reforsa ho artigu 41 lei númeru 05/2017 kona-ba lei arma branka. Maibé, tribunál halo fali alterasaun jurídiku ho krime ida de’it kontra bandu ho artigu 316, númeru 3 iha kódigu penal Timor-Leste, ne’ebé ho moldura penál pena tinan rua to’o tinan neen no bele selu multa.

Advogadu privadu, Fernando da Costa. Imajen/Nelson de Sousa

Defeza Fernando da Costa hateten, hanesan mandatóriu ho desizaun tribunál nian hatudu duni justisa katak pistola ne’ebé nia kliente na’in rua hatama tanba hanesan pistola desportiva. Maibé, laiha lisensa hosi Autoridade Aduaneira (Alfándega) atu selu taxa ba estadu hatama ho dalan illegal.

“Tribunál absolve ha’u-nia kliente na’in rua hodi aplika de’it selu multa ho selu kustu judisiáriu,”  hateten advogadu privadu, Fernando da Costa ne’ebé fó asisténsia legal ba arguidu na’in rua, ba Ajénsia Tatoli, ohin, iha nia kna’ar fatin SNANAI Konsultan Advokasia, Taibesi, Dili.

TDS sei fó prazu loron 15 ba parte Ministériu Públiku no Defeza ho despaxu leitura primeiru instánsia, karik la satisfás bele halo rekursu.

Iha leitura akórdaun ne’e prezide hosi juis singular Samuel da Costa Pacheco, Ministériu Públiku reprezenta hosi Prokuradór Jacinto Babo, arguidu-sira hetan asisténsia legal hosi advogadu privadu Fernando da Costa.

Jornalista : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here