Kondenadu na'in-rua nu'udar membru PNTL partisipa iha kontinuasaun aúdensia julgamentu iha TDD kona-ba trajedia Kulu-hun. Imajen/Dok.TATOLI

DILI, 27 marsu 2020 (TATOLI)-Tribunál Distritál Dili (TDD), ohin,  foti desizaun final hodi aplika pena kumulativu ba kondenadu José Alves Pereira, tinan 25 prizaun no ba kondenadu Francisco Maria de Sousa  ho pena prizaun tinan 20.

Notísia Relevante : Kazu Kulu-hun, Komandante Lahatene Motivu husi Arguido JPA Tiru Vítima

Joven na’in tolu ne’ebé mate iha trajedia Kulu-hun. Imajen/foti hosi google

Iha leitura akórdaun Juiza  prosesu Sribuana da Costa hateten, razaun tribunál aplika pena ne’e tanba haree ba faktu-sira iha produsaun prova iha julgamentu sira-liu ba hosi deklarasaun parte-sira, hanesan, arguidu, lezadu, testemuña, iha duni faktu ne’ebé forte katak kondenadu-sira evolve forte iha trajédia Kulu-hun, ne’ebé rezulta joven na’in tolu mate-fatin no vítima nain lima seluk kanek todan iha kalan 17 novembru 2019.

Tuir mós ezame balístiku  hosi Polísia Sientífika Investigasaun Kriminál (PCIC) prova katak, bala-musan ne’ebé kona-ba ba vítima-sira, balun kanek no balun mate, mai duni hosi pistola ne’ebé tiru hosi kondenadu na’in rua.

Liuhosi audiénsia julgamentu liu-ba, Juiza Sribuana da Costa, hateten, kondenadu Jose Alves Pereira, rekoñese aktu ne’ebé nia halo mezmu kondenadu Francisco Maria de Sousa, la deklara integralmente. Maibé, realidade hatudu, ema mate no kanek duni, ho nune’e, tribunál entende ho prova sira-ne’e katak, kondenadu na’in rua iha duni envolvimentu hamutuk iha kazu ne’e.

Notísia Relevante : Kazu Kuluhun, MP Solisita ba TDD Aplika Pena Prizaun La Bele Menus Husi Tinan 25

Masdre Guilermina Marsal, apresenta hela Familia vitima Joventudi na’in tolu ne’ebé kondenadu na’in rua nu’udar membru PNTL tiru mate iha trajedia Kulu-hun de Baixo bainhira halao dilalogu no rekonsiliasaun ho familia vitima Kuluhun iha Salaun Madre Canosiana, Balide, Segunda 18 Marsu 2019. Imajen/Antonio Goncalves

Tribunál kondena Jose Alves Pereira nu’udar ko-autór konkursu materiál ba krime Omisídiu Agravadu tolu (3) no krime Tentativu Agravadu lima (5) , ne’ebé iha forma tentadu iha artigu 139 alínea a) no b), 23 no 24 kódigu penal Timor-Leste ho nia moldura penal, iha pena akumulativu bainhira arguidu tiru-mate ema ida ka oho ema ida ba krime omisídiu agravadu ho ninia pena prizaun tinan 15, no ba kada ema ida hakanek krime omisídiu agravadu pena prizaun tinan 7, nune’e konta hamutuk hosi ema nain tolu (3) mate no vítima na’in lima (5) kanek grave total pena tinan 80, maibé tuir lei iha moldura penal só aplika pena to’o de’it tinan 30 labele liu, tanba ne’e tribunal tetu desizaun hodi redús ba pena únika tinan 25 ba kondenadu Jose Alves Pereira.

Ba kondenadu Francisco Maria de Sousa, Juiza Sribuana da Costa, esklarese, ko-autór konkursu krime tolu (3) ba krime omisídiu agravadu no krime lima (5) omisídiu agravadu, ne’ebé iha forma tentadu iha artigu 139 alínea a) no b), 23 no 24 kódigu penal Timor-Leste.

Pena akumulativu bainhira tiru-mate ema ida ka oho ema ida ba krime omisídiu agravadu ho ninia pena prizaun tinan 12, no ba ema ida hakanek krime omisídiu agravadu pena prizaun tinan lima (5), nune’e tribunál tetu aplika pena únika tinan 20 ba kondenadu Francisco Maria de Sousa.

Notísia Relevante : Tribunal Halo Inspesaun Lokál Ba Trajédia Kulu-hun

Hosi masakre Kuluhun  ne’e rezulta joven nain-tolu matem maka hanesan, Luis Cavin Saldanha (18), Leonaldino Eduardo Ximenes (20) ho Eric Joni Ribeiro (20).

Vítima na’in-lima ne’ebé hetan kanek grave mak hanesan Teresinha Vila Nova (23), Agrefino da Costa (19), Pinto Gama (25), Paulino de Jesus (36) no Lúcio do Carmo (30).

Defeza Estáquio Guterres, ne’ebé fó asisténsia legal ba kondenadu na’in rua deklara katak, nia-parte ladún konkorda ho desizaun tribunal nian liu-liu ba arguidu Francisco Maria de Sousa.
Tanba nia konsidera tribunál rasik seidauk fundamenta didi’ak no la haree ba julgamentu hirak ne’ebé lao, liu-liu haree ba vítima inklui sasin fó deklarasaun katak sira-la haree arguidu Francisco Maria de Sousa iha momentu ne’ebá tiru.  Katak,  sira-haree tiru duni mais tiru sa’e de’it ba leten, maibé arguidu Jose Alves Pereira mak tiru hodi rezulta ema mate no kanek.

“Desizaun tribunál nian oin-seluk ba arguidu Francisco ho pena tinan 20,’’ hateten Estáquio Guterres.

Notísia Relevante : Kazu Kulu-hun, Sasin Deklara Arguido Sira Mak Tiru iha Tenda Laran

Tuir prosedimentu no norma legais katak bainhira parte-sira la satisfás ho desizaun primeira instánsia nian, maka  durante loron 15 nia-laran (sura hosi desizaun tuun) bele halo rekursu.

Iha leitura akórdaun final ne’e, prezide hosi Juis koletivu Sribuana da Costa, Ministériu Públiku reprezenta hosi prokuradór Jacinto Babo no kondenadu-sira hetan asisténsia legal hosi Defensór Públiku Estáquio Guterres.

Remata desizaun iha TDD, kondenadu na’in rua ho hakru’uk akompaña hosi Guarda Prizionál ba sa’e karreta Prizionál nian hodi lori ba Prizaun Becora.

Notísia Relevante : Trajédia Kulu-Hun, Tribunal Rona Deklarasaun Arguido JPA

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here