Diretór Nasionál Empregu Esteriór SEPFOPE, Filomeno Soares. Imajen Tatoli/Natalino Costa

DILI, 27 marsu 2020 (TATOLI) – Diretór Nasionál Empregu Esteriór husi Sekretaria Estadu Formasaun Profisionál no Empregu (SEFOPE), Filomeno Soares, informa traballadór timor-oan iha Austrália sei kontinua mai Timor-Leste tanba sira ninia kontratu ramata ona.

“Iha sábadu ne’e, ita-nia traballadór kuaze na’in-24 sei filafali mai Timor-Leste tanba sira ninia kontratu ramata ona no sira labele kontinua servisu. Tanba ne’e sira deside atu fila”, nia dehan ba Agência Tatoli, iha ninia knaar fatin, SENAI, Becora, sesta ne’e.

Nia adianta, traballadór na’in-24 ne’e hanesan sira-nia maluk na’in-20 ne’ebé fila ona loron hirak liubá no sira hotu servisu iha Austrália liuhosi Seasonal Worker Programme ba durasaun fulan-tolu.

“Tanba ne’e ho ita-nia situasaun ida agora ho Coronavírus maka nu’udar parte Governu ne’ebé haruka sira ba servisu, iha obrigasaun atu kontinua halo akompañamentu. Ami submete ona sira-nia naran ba parte imigrasaun kuandu sira na’in-24 tun husi aviaun tenke ba karantina durante loron 14 no ami deside sira labele ho família lai tanba atu prevene Coronavírus labele da’et ba sira-nia maluk seluk, liuliu sira nia família iha uma”, Filomeno subliña.

Tuir Diretór ne’e, konfirmadu ona katak iha sábadu ne’e traballdór sira sei fila mai Timor-Leste iha dader, ho aviaun husi Austrália nian hanesan ho sira-nia maluk ne’ebé antes ne’e fila ona.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here