Otél Novo Horizonte, Metiaut, Dili. Imajen/Felicidade Ximenes

DILI, 27 marsu 2020 (TATOLI) – Sidadaun sira ne’ebé hela iha kuarentena Otél Novo Horizonte, Metiaut, presiza tebes atu Ministériu Saúde (MS) esplika norma no regulamentu kuarentena nian, tanba desde ekipa sira koloka ema hirak ne’ebé fila husi estranjeiru iha otél refere, sira rasik lahatene kona-ba regulamentu.

Aleinde ne’e timor-oan sira ne’ebé hela iha kuarentena mós preokupa ho hahán ne’ebé mak oferese.

Raul Vicente Correia, ne’ebé hela iha kuarenena Ótel Novo Horizonte, haktuir nia tama kuarentena iha 23 marsu bainhira fila hosi Tasmania, Austrália no iha loron ne’e ekipa hosi MS simu tiha sira no lori ba fatin kuarentena durante loron 14 nia laran, maibé sira rasik lahatene sé loos maka responsabiliza ba sira.

“Hahú kedas simu ami husi Aeroportu Comoro, ami lahatene sé maka responsabiliza ba ami to’o agora. Tanba realidade seidauk iha ema Ida atu briefing ba ami kona-ba regulamentu kuarentena nian. Regra ne’e importante tebes tanba presiza regula ami hotu, selae ita lahatene”, hateten Raul Vicente Correia ba Agência Tatoli via rede sosiál, sexta ne’e.

Notísia Relevante: Diretora Odete: “Situasaun Obriga Ema-Nain Rua Tenke Iha Kuartu Ida”

Tuir nia, presiza mós estabelese pontu kontaktu ka responsavél ruma se lae maka idaidak bele halo buat ruma tuir hakarak.

“Presiza iha xefia ida, se lae maka idaidak halo ninian hanesan polísia sira halo seguransa halo ninian ketak no médiku sira iha ne’e halo sira nian ketak no ami sira iha ne’e mós halo ami nian ketak, ita atu ba ne’ebé loos. Buat hotu tenke regula se lae ita halo ita-nian tuir hakarak, orsida polísia mak mai halo fali médiku nia servisu esplika fali saúde, ba médiku sira mós iha hotu dalaruma médiku sira bele halo fali servisu seguransa nian mós iha, atu buat sira ne’e labele akontese maka presiza iha xefia ida”, nia haktuir.

Raul Vicente akresenta, kona-ba toba fatin di’ak hela tanba sira na’in hirak ne’ebé mai husi Austrália, kada ema ida okupa kuartu ida, maibé ba sira seluk ne’ebé mai hosi nasaun seluk kada kuartu okupa hosi ema na’in-rua ka tolu.

“Kona-ba toba fatin ba ami na’in-hira husi Australia ne’e ami toba iha kuartu ketak-ketak no ema ida iha kuartu Ida, maibé kolega sira seluk ne’ebé mk mai husi fatin seluk, ema na’in-rua ka tolu okupa kuartu ida. Ne’e la tama standard ba regulamentu ijiene ninian hodi prevene moras ne’e”, Raul adianta.

Nia subliña, kona-ba hahán iha inísiu di’ak, maibé kuandu loron aumenta hahán komesa aat to’o ohin loron ninian ladun favorese ona.

“Oras han matabisu nian hahú fali iha tuku sia liu, dalaruma tuku 10 liu.
Oras han meudia nian bele mai fali iha tuku rua ka tuku tolu mak han no oras han kalan nian dalaruma mai sedu dalaruma mai tarde hanesan tuku 8 liu mak foin mai. Ne’e bele estraga ami nia stómagu no ami sai hosi fatin ne’e ami bele sofre moras seluk. Ida ne’e maka halo ami la satisfeito ho modelu kuarentena ne’ebé mak ita-nia Governu halo ba ami hanesan sidadaun nasaun ninian”, Raul espresa.

Nia esklarese liután, to’o agora seidauk iha doutor ida maka atu mai halo teste médiku ba ami iha fatin kuarentena.

“Husik hela ami hanesan ne de’it lahatene to’o bainhira mak atu mai fó teste médiku ba ami atu ami bele konfirma katak ami laiha buat ida ho bele fila ba uma ona. Kona-ba saúde ami la presiza teste tanba to’o agora ami loron haat ona iha ne’e maibé ami sente laiha buat Ida, ne’e ami atu ba teste hanusa”, nia lamenta.

Tuir Raul, loloos pesoál saúde sira mak tenke halo teste ba ema sira iha kuarentena atu konfirma kondisaun ema iha kuarentena.

“Pesoál saúde sira iha ne maibé lahalo teste ba ami,
sira hanesan standby de’it iha ne’e no hein to’o ema ruma persiza mak ba halo konsulta”, nia salienta.

Kona-ba maneira simu hahán iha kuarentena, hodi kumpre regulamentu ida katak tenke hamrik dook malu hanesan metru ida liu.

“Modelu han ne, hahán sira tau iha meza ida iha ai-hun ida nia sorin, maka ami hamrik ba hamutuk de’it iha ne’ebá mak idaidak ba foti hahán lori ba han iha kuartu”, nia haktuir.

Jornalista: Antónia Gusmão

Editora: Julia Chatarina

1 KOMENTÁRIU

  1. Regulamentu presija tebea iha fatin karantina, se lae situasaun lao lalos,. Se bele iha hotel audian mos tengki toma konta Regulamentu karantina nian. Pior liu ema sira (liu joven balun) iha fatin karantina hotel audian funa arbiru deit. Favor ida toma atensaun ba situasaun ne lai.

HAKEREK NO HATÁN

Please enter your comment!
Please enter your name here