Sekretáriu Estadu Komunikasaun Sosiál, Merício Juvinal dos Reis Akara. Imajen Tatoli/Egas Cristovão

DILI, 27 marsu 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’, hateten Governu liuhosi Sekretaria Estadu Komunikasaun Sosiál (SEKOMS) kontinua garante liberdade imprensa, tuir konstituisaun haruka no sei la husik Instituisaun Governu halo intervensaun direita ba editoriál mídia nian.

“Nu’udar Sekretáriu Estadu Komunikasaun Sosiál, ha’u sei la husik indivu ida atu halo intervensaun ba editoriál. Ha’u hateten filafali sei laiha intervensaun ema-ida ba redasaun sira no ha’u husu Instituisaun Governu atu labele limite no fó asesu ba jornalista sira hodi asesu ba informasaun relasiona ho COVID-19”, dehan Akara liuhosi Konferénsia Imprensa, ne’ebé hala’o iha salaun SEKOMS, Palásiu Governu, sesta ne’e.

Governante ne’e rekoñese, daudaun iha situasaun Estadu Emerjénsia, tanba ne’e públiku presiza akompaña informasaun atuál kona-ba COVID-19, nune’e públiku labele pániku.

“Ba Instituisaun Governu hotu, labele halo intervensaun ba independénsia editoriál mídia sira, maibé tenke garante divulgasaun informsaun ne’ebé loloos no kredível kona-ba COVID-19, nune’e bele hanesan meuiu atu kontribui ba kombate informasaun falsu no evita pániku iha sosiadade iha territóriu Timor-Leste”, nia reforsa.

Sekretáriu Estadu ne’e konsidera katak, papél mídia importante tebes ba divulgasaun informasaun.

“Governu konsidera mídia hanesan parseiru estratéjiku hodi kombate COVID-19 liuhosi informasaun ne’ebé maka loloos no kredível ba públiku tomak. Ho ida-ne’e, Governu apresia mídia sira-nia servisu no esfosu maka’as durante ne’e hodi kontribui divulga informasaun loloos ba públiku tomak”, nia subliña.

Tanba ne’e, Akara fó hanoin ba Instituisaun Governu hotu atubele kompriende didi’ak knaar prinsipál mídia no jornalista sira nian, no husu entidade sira hotu tenke kolabora hodi fasilita mídia sira asesu ba informasaun ne’ebé loloos hodi serví ba interese públiku tomak.

Nia mós husu ba jornalista sira hotu atu mantein kumpre kódigu étika jornalizmu iha prátika loron-loron, nune’e bele asegura informasaun kredível no konfiável.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here