Mídia Nasionál sira. Imajen/Espesiál

DILI, 27 marsu 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’, hateten nia parte sei esforsu hela nune’e  iha tempu badak nia-laran jornalista sira hotu sei hetan ekipamentu sufisiente hodi proteje-an bainhira halo kobertura kona-ba COVID-19.

“Ekipa tékniku husi Sekretaria Estadu Komunikasaun Sosiál (SEKOMS) hahú ona diskute preokupasaun ita-bo’ot (jornalista) sira nian, hafoin iha tempu badak ha’u sei informa fali. Maibé dala-ida tan hakarak informa katak ha’u sei defende ida-ne’e tanba mídia presiza atensaun”, dehan Akara liuhosi Konferénsia Imprensa, ne’ebé hala’o iha salaun SEKOMS, Palásiu Governu, sesta ne’e.

Tuir governante ne’e, ekipa konjunta ba kombate Coronavírus ne’ebé lidera husi Ministériu Saúde (MS) rasik ko’alia ona kona-ba kestaun ne’e.

“Ekipa konjunta ba kombate Coronavírus halo enkontru iha edifísiu Ministériu Saúde nian iha Caicoli no ko’alia mós kona-ba kestaun ne’e. Espera katak rezultadu di’ak, maibé ha’u rasik mós sei ko’alia ho ha’u nia kolega Membru Governu sira ne’ebé maka iha ekipa konjuta ne’e, atu haree asuntu ne’e ho sériu. Tanba ne’e, hakarak dehan preokupasaun mídia nian-ne’e iha ona ita nian ajenda no agora teknikamente hahú la’o ona, ne’ebé iha solusaun imediata di’ak liután. Ha’u mós prefere ida-ne’e”, hateten Akara.

Nia rekoñese, Governu fó sai ona katak sei fó apoiu ba parte médiku sira, Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), maibé parte SEKOMS mós hakarak fó hanoin katak mídia mós Governu tenke fó apoiu, liuliu jornalista sira tanba sira mós iha liña oin hamutuk ho médiku, polísia no forsa sira.

“Ein prinsípiu SEKOMS sei defende ida-ne’e, tanba mídia presiza atensaun sériu. Ha’u ko’alia ho ministériu relevante atu buka dalan oinsá atu tau atensaun ba ita-nian jornalista sira iha situasaun ida hanesan ne’e”, nia adianta.

Maski nune’e, Akara husu ba mídia estadu no privadu presiza kria kondisaun mínimu ba jornalista sira.

“Ha’u husu institusaun mídia estadu no privadu tenke kria kondisaun mínimu ba jornalista sira, hafoin Governu haree atu kompleta no reforsa tan, tanba institusaun hotu iha obrigasaun atu asegura ninia funsionáriu sira”, nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here