Prezidente Repúblika,Francisco Guterres Lú Olo. Imajen Tatoli/António Gonçalves

DILI, 27 marsu 2020 (TATOLI) – Prezidente Repúblika, Francisco Guterres ‘Lú Olo’ husu ba sidadaun hotu atu labele halo diskriminasaun hasoru ema sira iha kuarentena, tanba ne’e meiu ida atu prevene COVID-19 hada’et husi ema ba ema.

“Ha’u husu ba ita hotu hodi labele halo diskriminasaun hasoru ema ne’ebé hetan moras COVID 19 ka foin iha sintoma atu hanesan moras ida ne’e. Ita-nia servisu saúde bele ona halo izolamentu ba sira no halo tratamentu. Ita labele mós halo diskriminasaun ba maluk sira ne’ebé foin fila mai Timor-Leste husi rai afetadu ho Coronavírus. Timor-oan ka ema husik nasaun sira seluk, ne’ebé Governu husik fila mai, tama iha fatin kuarentena hanesan medida prevensaun ida,” Tenik Xefe Estadu liuhosi mensajen Estadu Iha Palásiu Prezidensiál, Bairro Pité, sesta ne’e.

PR Lú Olo rekoñese, Coronavírus ne’e bele da’et husi ema ba ema no da’et lalais de’it, tanba ne’e tenke halo prevensaun.

“Bainhira ular kiik’ona ne’e infekta ba ema ruma, ema ne’e tenke hatene haree-an no haree oinsá la hada’et moras ne’e ba ema seluk. Da’et lalais liu bainhira ema barak moris hamutuk ka halo atividade hamutuk. Ema ne’ebé hatudu saúde di’ak hela, bele iha ona ular-oan ne’e, iha nia isin. Bainhira nia fani ka mear, ular-oan haksoit ho nia kaben ka inus been no sei kontamina ema ne’ebé hamriik ka tuur besik,” Xefe Estadu afirma.

Ho nune’e, Aman ba Nasaun ne’e apela atu labele hetan moras, tenke iha prátika distánsia sosiál katak populsaun ida-idak tenke hadook-an, metru ida husi ida seluk, tuir orientasaun husi Organizasaun Mundiál Saúde (OMS).

Iha sorin seluk, Primeiru Ministru, Taur Matan Ruak,  hatete Governu  hahú esforsu hodi hadi’a kondisuan ba kuarentena sira ne’ebé estabelese husi Ministériu Saúde (MS).

“Governu sei halo esforsu atu hadi’a kondisaun ne’ebé ladún di’ak”, Xefe Governu adianta.

Haree ba kondisaun kuaretena, PM Taur hateten Governu mós buka hela alternativa ona atu halo kuaretena ba sidadaun sira ne’ebé mai husi nasaun afetadu ba COVID-19, atu kuaretena iha nia uma, maibé labele kontajia ho família.

Ho nune’e, Eis Prezidente Repúblika ne’e husu ba timor-oan sira iha kuaretena atu labele preokupaho kondisaun fatin, maibé tenke preokupa liu ba saúde no vida.

“Loos momentu hanesan ne’e sira labele  haree kondisaun katak hela iha otél ka hela iha fatin a’at, maibé dahuluk maka presiza haree saúde, seguransa no moris, hafoin mak buat seluk. Ita preokupa buat seluk ita dispoen ita-nia vida,” nia sujere

Xefe Ezekutivu ne’e dehan, Governu kria kuaretena atu prevene COVID-19 la hadae’t ba família, komunidade no nasaun ne’e.

“Tanba se ita husik de’it (timoroan mai husi nasaun afetadu COVID-19) maka integra ba família bele kontajia ba nasaun tomak”, nia akresenta.

Ho nune’e, Xefe Governu adianta hela iha kuaretena hodi bele fasil kontrola husi médiku sira durante loron 14 hafoin laiha sintoma COVID-19 maka bele ba uma.

“Ita observa esperiénsia país sira seluk hanesan Italia no Xina haree ba kuaretena de’it laiha kondisaun ba hotu tanba ida-ne’e mak nasaun barak deside lockdown atu sidadaun sira hela de’it iha kuarentena atu labele kontajia vírus ne’e ba ema seluk”, nia salienta.

Entertantu, Tuir dadus husi MS ne’ebé Agência Tatoli asesu iha portal Palácio das Cinzas katak, atualidade kazu COVID-19 hahú husi loron 5 to’o 25 marsu ne’e, timor-oan iha kuaretena uma ka pasa ona kuarentena durante loron 14 hamutuk 149 no sei akompaña 297 ho totál na’in-446, kuanrentena A na’in-65, kuaretena B hamutuk 99, kuarentean C na’in-30, enkuantu kuaretena D na’in-38 ho totál hamutuk 708.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here