Prezidente Repúblika,Francisco Guterres Lú Olo. Imajen Tatoli/António Gonçalves

DILI, 27 marsu 2020 (TATOLI) –  Prezidente Repúblika, Francisco Guterres Lú-Olo, dekreta ona Estadu Emerjénsia hafoin Parlamentu Nasionál (PN) deside a-favór ho uninamidade hodi fó autorizasaun ba Xefe Estadu hodi dekreta, nune’e bele prevene populasaun husi COVID-19.

“Ha’u dekreta Estadu Emerjénsia atu prevene kalmidade públiku ne’ebé akontese ba ita husi COVID-19. Ha’u dekreta tanba konstitusaun fó dalan ba Estadu Emerjénsia bainhira iha kalmidade públiku. Ha’u dekreta ho autorizasaun husi Parlamentu Nasionál. Ha’u halo ida-ne’e ho resposabilidade tomak, nu’udar Prezidente Repúblika, atu proteje ita-nia ema, atu la husik moras Coronavírus destrói ita ida-idak no ita-nia nasaun”, tenik Xefe Estadu liuhosi Konferénsia Impresa iha Palásiu Prezidénsiál, Bairro Pité, sesta ne’e.

Xefe Estadu dehan, hahú entra ein vigór iha loron sábadu, 28 marsu, hahú husi oras 00:00  to’o 26 abríl 2020, oras 23:59, kalan fahe rua (meia-noite) Timor-Leste tama ona iha Estadu Emerjénsia atu fó dalan ba Governu implementa médida espesífiku sira hodi prevene Coronavírus ka COVID-19.

Notísia Relevante: Estadu Emerjénsia, Governu Sei Estabelese Regra Limita Movimentu Populasaun

“Sei limita ka suspende ita-nia direitu balun, ita-nia liberedade balun, garantia balun ne’ebé konstituisaun fó dalan ba sidadaun ida-idak no ba hotu-hotu, la’ós atu halakon maibé suspende ka limita atu defende interese boot liu mak povu nia vida, ita-nia vida no ita-nia família nia vida”, Xefe Estadu adianta.

Ho nune’e, Nia husu ba povu tomak atu simu medida sira ne’e, ho dame no resepitu, inklui fó apoiu ba ekipa ne’ebé kria husi Governu atu servisu maka’as iha terrenu.

PR Lú Olo afirma, ho Estadu Emerjénsia ne’e atividade balun husi populasaun sei hapara no balun sei la’o atu garante sidadaun nia moris loron-loron, enkuantu Governu bele proíbe reuniaun no manifestasaun ka eventu sosiál, limita sirkulasaun ema-nian no atividade ne’ebé envolve ema barak tanba risku ba kontájiu husi ema ba ema.

PR Lú Olo mós fó mensajen ba timor-oan tomak , katak iha luta libertasaun nasionál timor-oan tenke fó liman ba malu hodi hasoru inimigu COVID-19.

“Hamutuk ita tenke fó apoiu ba Governu hodi implementa medida ne’ebé efetivu atu antesipa vírus ida ne’e labele da’et ba bei-beik, ho nune’e bele proteje ita-nia povu. Ita tenke reforsa Governu oinsá de’it, iha tempu ne’ebé de’it,” PR Lú-olo afirma.

Aliende ne’e, Xefe Estadu husu ba partidu polítiku sira, líder nasionál, kuadru no militante hotu-hotu atu tau sees diferensa polítika hodi fó liman ba malu nu’udar meiu ida atu kombate hasoru moras aat hanesan COVID-19.

Ba médida espesífiku, Aman ba Nasaun ne’e refere liután, durante períodu Estadu Emerjénsia sei define husi Governu ho apoia husi órgaun estadu soberania hotu-hotu.

Governu ninia susesu depende ba kolaborasaun husi sidadaun ida-idak no husi ema-sira hotu.

“Luta ne’e ita-nia hotu. Hamutuk ita sei manan Coronavírus ho ita-nia matenek organizadu nu’udar povu ida de’it no hakarak ida de’it atu moris saudável, tanba ne’e mai ita hamutuk hosoru lesuk Coronavírus hamutuk proteje ita nian-an, ita-nia família no ita-nia povu”, nia afirma.

Hodi deklara Estadu Emerjénsia iha territóriu nasionál tanba hafoin diskusaun iha PN, maioria a-favór ba pedidu ne’e.

Konsellu Ministru aprova proposta Estadu Emerjénsia ne’e iha loron segunda (16/03) no Prezidente Repúblika, Francisco Guterres “Lú Olo” aprezenta pedidu autorizasaun ne’e ba Parlamentu Nasionál iha loron tersa (24/03).

Entretantu, iha loron kinta (26/03), PN halo debate no fó biban ba deputadu ida-idak hodi halo deklarasaun votu nominál ho rezultadu a-favór 64, kontra o abstensaun 0.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here