Fromatura PNTL iha aniversariu PNTL ba da-XX, 27 marsu 2020. Imajen/Eugénio Pereira

DILI, 27 marsu 2020 (TATOLI)- Komandu Polísia Nasionál Timor-Leste (PNTL), ohin, selebra aniversáriu ba dala-XX (27 marsu 2000-27 marsu 2020). Ba aniversáriu ne’e, Komandu PNTL  kompromete hadi’a atitudade membru tomak atu sai forsa ida disiplina no respeita regra no servisu hotu hodi lori Instituisaun PNTL sai forsa profisionál.

Notísia Relevante : Superintendente Na’in-hitu Prenxe Rekizitu ba Vaga Hitu iha Komandu PNTL

Aniversáriu PNTL ba tinan ne’e  selebra ho parade militár simples ne’ebé lidera hosi Ministru Defeza no Ministru Interiór interinu, Filomeno da Paixão de Jesus, no akompaña hosi Komandante PNTL, Komisáriu Fautino da Costa ho Segundu Komandante, Komisáriu Mateus Fernandes.

Halo teste ba membru PNTL hodi prevene COVID-19. Imajen/Eugénio Pereira

Molok parade hahú, ministru no komandante-sira submete ba halo teste ho ekipa Médiku PNTL uza Infrared Thermometer hodi boserva sira-nia kondisaun fíziku ka suhu temperatura hodi prevene pandemia Coronavirus ka COVID-19

Ministru Filomeno Paixão dehan, tinan ne’e Estadu Timor-Leste hasoru hela problema oinsá salva povu no nasaun hosi peste letál  (wabah mematikan) ne’e.

“Ita selebra aniversáriu simples. Ha’u la konkorda atu ema barak demais para ita prevene COVID-19 tuir apelu Organizasaun Mundiál Saúde (OMS),” tenik Ministru Filomeno Paixão ba jornalista iha Kuartél Jerál PNTL, Caicoli, Dili.

Ministru Filomeno Paixão apela ba membru PNTL tomak kontinua hala’o servisu konta ho apoiu FALINTIL-Forsa Defeza Timor-Leste (F-FDTL) hodi garante seguransa másimu ba povu no estadu.

Nia husu ba membru PNTL hotu atu fiar nafatin ierarkia Komandu hodi haforsa servisu hotu-hotu la’o tuir regra no lei.

Iha fatin hanesan, Komisáriu Faustino da Costa, hato’o parabéns ba membru PNTL hotu-hotu ne’ebé kumpre nafatin misaun no tinan 2020 Komandu PNTL konsidera nu’udar tinan disiplina hodi hadi’a profisionalizmu servisu.

“Ho tinan XX, ita eziste ita hotu tenke esforsu makaas liután atu serbí ita nia komunidade no povu,” tenik Komisáriu Faustino da Costa.

Nia hateten, 2020, tinan disiplina ne’ebé Kompandu implementa sein rezerva, tanba ho tinan 20 maski PNTL la halo serimónia ruma, maibé hatudu katak PNTL sei hamosu duni estrutura komandu úniku  ne’ebé komandante munisípiu, komandante unidade hotu -hotu kumpre regra no la iha komandante ou ema ne’ebé la’ós instituisaun ninia sai fali hanesan komandante para simu orden.

Iha selebrasaun ne’e Komandu PNTL fó fiar ba komandante unidade no komandante munisípiu-sira maka sei atribui promosaun diviza ba membru-sira ne’ebé naran tama ona lista no aprova ona.

Kona-ba  totál membru hira mak promovidu, Komisáriu Faustino la konsege fó esplikasaun klaru.

“Parabéns mós ba sira-ne’ebé sa’e diviza automátika ne’ebé delega ba komandante-sira maka atribui,” tenik nia.

Ho ezisténsia tinan 20 Instituisaun PNTL, Komisáriu Faustino dehan, PNTL kontinua hasoru dezafiu balun, maibé dezafiu sira-ne’e sai sasukat atu lori PNTL la’o ba-oin ho metin liután.

Daudaun ne’e, PNTL mós aprezenta ona dekretu lei no estatutu Instituisaun PNTL ba Ministru Interiór hodi aprezenta ba Konsellu Ministru atu haree hodi aprova.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here