Primeiru-Ministru, Taur Matan Ruak. Imajen Tatoli/ Egas Cristovão

DILI, 27 marsu 2020 (TATOLI) – Primeiru Ministru, Taur Matan Ruak, apela ba jornalista sira hotu iha Timor-Leste atu kontribui ho informasaun ida ne’ebé di’ak atu populasaun labele pániku hasoru moras COVID-19.

“Ha’u apelu ba imi jornalista sira katak situasaun hanesan ne’e, imi tenke kontribui ho serenidade atu ema kalma no labele tau sensasionál tanba buat sensasionál ita halo ema pániku no dez-orientadu no halo ema kria problema, ne’e labele,” tenik PM Taur hafoin enkontru semanál ho Prezidente Repúblika iha Palasiu Prezidensiál, Bairro Pité, sesta ne’e.

Ho nune’e, Eis Prezidente Repúblika dehan, Governu sei halo esforsu hodi apoia jornalista sira atu kobre informasaun sira hodi públika ba populasaun atu labele pániku Coronavírus ne’ebé nasaun hotu enfrenta.

“Ita boot sira hatene horisehik, Parlamentu Nasionál levanta atu Governu mós tau matan mós ba imi nia seguransa, ami haree saida mak ami bele halo, maibé ha’u mós hakarak apela ba imi (jornalista)  ninia xefe sira atu tau matan mós ba imi nia seguransa tanba labele haruka imi sein garante seguransa”, Xefe Governu adianta.

Tuir PM Taur, Estadu sei tau matan hotu ba jornalista no sidadaun sira hodi perevene COVID-19 iha Timor-Leste.

“Ha’u aseita preokupasaun Deputadu sira iha Parlamentu Nasionál liuliu fó importansia ba imi (jornalista) atu reprezenta ita-nia nasaun no demokrasia iha situasaun difísil hanesan ne’e”, nia afirma.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here