Coronavirus

DILI, 27 marsu 2020 (TATOLI)-Kondisaun Saúde pasiente pozitivu COVID-19 ne’ebé dadaun ne’e izola iha Sentru Saúde Vera Cruz hahú hatudu progresu hafoin hetan tratamentu saúde hosi ekipa medíku.

Diretóra Jerál Prestasaun Saúde, Odete da Silva Viegas, relata pasiente estranjeiru ne’ebé kona COVID-19 iha ona kondisaun di’ak, garante sei rekupera lalais iha tempu badak, tanba ekipa médika kontinua halo esforsu hodi fó tratamentu.

Notísia Relevante :Timor-Leste Foin Deteta Kazu COVID-19 Ida

Diretora Prestasaun,Saude,Odete Viegas,Imajen/Felicidade Ximenes

“Pasiente ne’e agora daudaun ita izola iha Sentru Saúde Vera Cruz kondisaun ne’ebé di’ak tebes no ita-nia médiku sira sei kontinua akompaña hela”, dehan Odete da Silva Viegas ba jornalista sira iha kinta (26/03/2020).

Notísia Relevante :Timoroan Na’in-lima Negativu ba COVID-19

Pasiente ne’e deteta pozitivu ba pandemia coronavirus hafoin Ministériu Saúde ho Organizasaun Mundiál Saúde (OMS) haruka sampel ran ba Ospitál Darwin hodi halo teste foinlalais.

“Ita hotu hein katak kazu daruak nian labele mosu tan iha ita-nia ra’in para ita prepara fatin ho másimu liután”, Odete espera.

Notísia Relevante :Timoroan 34 Fila Hosi Austrália Laiha Sintoma COVID-19

Atu evita mosu infesaun foun COVID-19 ba ema, Odete sujere atu populasaun sira hamenus movimentu públiku no halo tuir orientasaun Ministériu Saúde ho Organizasaun Mundiál Saúde maka tenke fase liman bebeik uza sabaun, uza maskara, proibiu ka’er liman no seluk tan.

Resultadu teste ba Timoroan  inklui ema estranjeiru hamutuk ema na’in 10 maka negativu ba COVID-19. Suspeitu hirak ne’e Itálianu na’in ida, Xíle na’in ida, Vietname na’in ida, F-FDTL na’in rua inklui timoroan na’in lima seluk tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here