Sekretáriu Estadu Ambiente Demétrio do Amaral de Carvalho. Imagen Tatoli/Egas Cristovão

DILI, 27 marsu 2020 (TATOLI) – Sekretáriu Estadu Ambiente, Demétrio do Amaral de Carvalho, informa empreza Caltech hamutuk ho Heineken deside suspende lansamentu ofisiál prosesu resiklajen lixu ba matéria konstrusaun, tanba Ministériu Saúde (MS) deteta ona ema na’in-ida pozitivu COVID-19 iha Timor-Leste.

“Ita suspende to’o kondisaun Coronavírus ne’e lakon”, tenik Demétrio ba Agência Tatoli via telefónika, sesta ne’e.

Nia realsa, tuir ajenda iha loron 20 marsu ne’e, empreza Caltech ho Heineken atu lansa ofisiál produsaun lixu ba materiál konstrusaun.

Maski, Empreza Caltech nia akizisaun ba ekipamentu kompletu ona no instalasaun sentrál resiklajen plástiku ba matéria konstrusaun finaliza ona iha Beduku, Dili.

Empreza Caltech, hamutuk ho Heineken, inklui ajénsia internasionál hanesan JICA, KOICA, USAID no Uniaun Europeia apoia fundu ba Mercy Corps hodi kuaze millaun $4-resin atu halo resiklajen lixu ba materiál konstrusaun.

Inisiativa husi kompañia rua ne’e hakarak halo lansamentu ofisiál ba resiklajen lixu sai matéria konstrusaun hodi apoiu polítika Governu liuhosi Sekretaria Estadu Ambiente (SEA) kona-ba zero plástiku.

Produsaun Lixu ba materiál uzada ne’e sei fó  benéfisiu hanesan minimiza porsentu 20 lixu plástiku ne’ebé kontein iha ambiente no aplika ekonomia sirkulár hodi transforma lixu ne’ebé laiha valór ba materiál ne’ebé iha valór.

Tuir dadus 2015, Dili kada loron prodús lixu tonelada 200 ne’ebé bainhira foti porsentu 20 husi plástiku ne’e entre tonelada 40 to’o 50 ba materiál konstrusaun maka bele ajuda minimiza impaktu ba ambiente no bele fó rendimentu ba entidade ne’ebé halo atividade atividade no prodús lixu.

Produsaun lixu ne’e, halo teste ona no hatudu kualidade di’ak ba jardín no estrada ninin sira ne’ebé importante ba solusiona lixu iha nasaun ne’e.

Entertantu mákina ne’ebé Caltech iha la’ós mákina ida boot hodi bele transforma tonelada 150 kada loron nian, maibé sira-nia kapasidade produsaun ho mákina bele prodús tonelada 4 to’o 5 kada loron.

Empreza Caltech ho esforsu rasik halo tratamentu ba lixu ka resiklajen ba kaixa mamuk, botir, ákua no mós sunu sasán ospitalár atubele mellora ambiente iha país ne’e. Polítika zero plástiku ne’e define ba prioridade tanba Timor-Leste nia kuantidade lixu plástiku ne’ebé prodús porsentu 18 to’o 20.

Bazeia ba lei baze ambientál númeru 26/2012 no lei numeru 2/2017, kona-ba sistema jestaun rezíduu sólidu urbanu no dekretu lei 32/2016 kona-ba estratéjia hodi melloramentu jestaun lixu urbana sira, sei hasai mós sirkulár ida ba empreza sira atu fó avizu ba kompradór atu hahú utiliza ona pasta amigavel ho ambiente.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here