Sekretáriu Estadu Komunikasaun Sosiál, Merício Juvinal dos Reis Akara. Imajen Tatoli/Egas Cristovão

DILI, 27 marsu 2020 (TATOLI) – Governu liuhosi Sekretaria Estadu Komunikasaun Sosiál (SEKOMS) sei estabele sentru mídia (Media Center) liga ho Coronavírus ka COVID-19, atu tulun mídia sira bele rekolla informasaun ho di’ak, nune’e labele halo pániku populasaun.

Sekretáriu Estadu Komunikasaun Sosiál, Merício Juvinal dos Reis ‘Akara’, konsidera inisiativa ne’e nu’udar ezijénsia husi asosiasaun rua hanesan Timor-Leste Press Union (TLPU) no Asosiasaun Jornalista Timor-Leste (AJTL) , ne’ebé antes ne’e husu atu parte Governu bele tau matan ba jornalista sira bainhira rekolla informasaun, tanba ne’e tempu badak nia-laran sei lansa sentru informasaun ida ne’e.

“SEKOMS konsidera ida-ne’e importante, tanba ita tenke halo duni, nune’e bele fásil asesu ba notísia kona-ba Coronavírus. Ekipa SEKOMS hamutuk ekipa konjunta ba prevensaun Coronavírus ne’ebé lideradu husi Ministériu Saúde (MS) hahú ona deskute kona-ba sentru mídia”, dehan Akara liuhosi Konferénsia Imprensa, ne’ebé hala’o iha salaun SEKOMS, Palásiu Governu, sesta ne’e.

Notísia Relevante: AJTL-TLPU Husu Governu Kria Sentru Mídia Ba COVID-19

Governante ne’e adianta, kona-ba estabelesimentu sentru mídia ba COVID-19 ne’e rasik, nia parte orienta ona ekipa SEKOMS atu prepara ba kestaun ne’e.

“Ha’u espera ita bele lansa iha tempu badak nia laran media center ho naran Coronavírus, nune’e bele fasilita jornalista sira hotu bele asesu informasaun ligadu ho Coronavírus”, Sekretáriu Estadu Akara subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here