Diretora Prestasaun Saude,Odete Viegas,Imajen/Felicidade Ximenes

DILI, 26 marsu 2020 (TATOLI)–Governu liuhosi Ministériu Saúde mós rekuñese katak fasilidade ka ekipamentu prevensaun ba COVID-19 limitadu maibé ministériu kompetente kompetente kontinua esforsu atu pesoál saúde sira tenke hetan hotu tanba sira mak besik liu suspeitu sira iha kuarentena.

“Ami rekoñese katak fasilidade ka ekipamentu prevensaun COVID-19 limitadu, tanba ne’e ami esforsu atu ita-nia pesoal saúde ne’ebé fó atendementu ba ema sira ne’ebé mak iha kuarentena bele hetan hotu,” Diretora Jerál Prestasaun Saude, Odete da Silva Viegas, ba jornalista sira iha Palasiu das Cinzas, Caicoli, Dili, ohin.

Nia afirma,  pelumenus nesesidade bázika hanesan luvas, maskrá tenke iha, nune’e ema ruma ka suspeitu iha entaun sira bele atende.

Aleinde ne’e, nia dehan, sira mós sei koloka pesoal ne’ebé mak sei atende ba moras ne’e purvolta 500-1000, nune’e sira bele kobre hotu iha Dili inklui munisípiu sira hotu.

“Ami mós husu brigada médika Cuba, Xina para mai ajuda ita no sira mai ho kedas sira-nia ekipa no mós husi Australia ne’ebé mak daudaun ne’e apoiu hela ita,” nia dehan.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here