Ministru Defeza no Ministru Interiór interinu, Filomeno da Paixão, halo enkontru ho Komandu PNTL, kinta (27/03/2020). Imajen/Eugénio Pereira

DILI, 27 marsu 2020 (TATOLI)- Molok implementa Estadu emerjénsia, Governu ho FALINTIL-Forsa Defeza Timor-Leste no Polísia Nasionál Timor-Leste (PNTL) sei halo sosializasaun ba povu iha territóriu Timor-Leste.

Notísia Relevante : Aplikasaun Estadu Emerjénsia Sei Fó-Sai Hosi Dekretu Governu

Ministru Defeza no Ministru Interiór interinu, Filomeno da Paixão de Jesus, mós, ohin, hala’o enkontru ho Komandante Jerál PNTL, Komisáriu Faustino da Costa, ho ofisiál superior PNTL tomak hodi fahe tarefa servisu hodi hein implementasaun estadu emerjénsia.

Ministru Filomeno reprezenta forsa rua, apela ba povu tomak atu hakmatek iha uma hodi kontribui halo prevensaun hasoru pandemia Coronavirus ka COVID-19 ne’ebé hahú rejista suspeitu ida pozitivu iha Timor-Leste.

Ministru Filomeno Paixão, deklara, molok aplika estadu emerjénsia, governu no forsa rua sei sosializa uluk ninia regra no prosedimentu-sira hodi povu bele koopera.

Nia dehan, bainhira povu la koopera atu hakmatek iha uma, povu rasik hasoru dezastre boot hanesan sidadaun Italianu-sira ne’ebé mate besik ema rihun lima ona, tanba la kumpre desizaun estadu durante aplika estadu emerjénsia.

Notísia Relevante : Estadu Emerjénsia, Governu Sei Estabelese Regra Limita Movimentu Populasaun

“Primeira semana, ita sei esplika ba povu too segundu semana, kuandu sira la koopera, forsa sei halo asaun. Mais, populasaun di’ak liu kumpre hodi hakmatek iha uma,”  hateten  Ministru Filomeno Paixão ba jornalista iha Komandu Jerál PNTL, Caicoli, Dili.

Parte seluk, Ministru Filomeno garante durante implementasaun estadu emerjénsia, PNTL no F-FDTL sei la viola direitu sidadaun sira-nia bainhira halo viajen iha situasaun emerjénsia ruma.

“Atu labele viola direitu sidadaun sira-nia, fasil. Povu-sira izola-aan para labele mosu problema,” tenik nia.

Governu rasik sei halo enkontru ho forsa hodi fahe tarefa servisu implementa estadu emerjénsia para salva povu nia vida hosi peste letál (wabah mematikan) ne’e.

Forsa rua mós sei hetan apoiu hosi Ministériu Saúde no Organizasaun Mundiál Saúde (OMS) kona-ba ekipamentu ne’ebé sira sei uza hodi prevene-aan hosi COVID-19.

“Ekipamentu ba forsa rua no osan sai ona prepara hotu ona, tanba Ministériu Saúde sei haree hotu kestaun sira ne’e,” tenik nia.

Filomeno lia tutan, bainhira aplika estadu emerjénsia signifika movimentu transporte públiku iha Dili too munisípiu tenke para no la iha ema ida maka halo movimentu ba mai.

Iha fatin hanesan Komandante Jerál PNTL, Komisáriu Faustino da Costa dehan, PNTL sei aplika medida zero toleránsia ba movimentu ilegál tama sai iha fronteira bainhira Prezidente Repúblika dekreta estadu emerjénsia.

“PNTL prontu nafatin atu asegura seguransa bainhira Prezidente Repúblika dekreta ona estadu emerjénsia, tanba membru polísia tomak sei koopera,” nia hateten.

PNTL no F-FDTL sei aplika zero toleránsia ba sidadaun ne’ebé tama Timor-Leste liuhosi dalan ilegál, aplika mós ba komunidade hirak ne’ebé hela iha área fronteira ne’ebé fasilita movimentu ilegál.

Faustino hatutan, atu labele mosu problema violasaun direitu umanu, dalan di’ak liu maka povu tuur hakmatek iha uma.

“Di’ak liu tuur hakmatek, tanba  COVID-19 ne’e mai la koñese o riku no o kiak,” nia apela.

PNTL mós sei la tolera joven no grupu organizasaun arte-marsiál  atu halo violénsia durante estadu emerjénsia.

Jornalista : Eugénio Pereira

Editór       : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here