Ministra Edukasaun, Juventude no Desportu, Dulce de Jesus Soares Fahe Material ba Estudante Ijame Nasionál Ano Leitivu 2019 ba Professora Escola Secundária Teknico Vocasional Tecnolojia Industrial Becora. Imajen/TATOLI

DILI, 27 marsu 2020 (TATOLI)-Atu Fasilita Estudante sira hodi estuda durante implementasaun estadu emerjénsia iha Timor-Leste, Ministériu Edukasaun Juventude no Desportu (MEJD), hahú semana oin sei fasilita prosesu aprendizajen ba estudante sira hosi Pre-eskolár to’o Sekundáriu liuhosi Mídia.

Tuir informasaun provizóriu MEJD sei uza kanál mídia hanesan Televizaun Edukasaun, Radiu Televizaun Timor-Leste (RTTL,ep), Radiu Komunidade no website Ministériu nian.

Notísia Relevante :PN Autoriza PR Dekreta Estadu Emérjensia

Parlamentu Nasionál iha kinta (26/03/2020) aprova ona estadu emerjénsia durante fulan ida hahú iha loron 28 fulan-marsu, oras 00:00 to’o loron 26 fulan-abríl 2020 hodi limita movimentasaun ema nian ba prevene coronavirus ka COVID-19.

Notísia Relevante :Estadu Emerjénsia, Governu Sei Estabelese Regra Limita Movimentu Populasaun

Antes ne’e , MEJD mós fó ona feriadu extraordináriu ba estudante sira hahú loron 23 to’o 28 fulan-marsu 2020 no sabadu (28/03/2020) sei kontinua implementa estadu emerjénsia hodi kontinua fó feriadu ba estudante sira.

“Ita implementa programa ne’e tanba atu tulun ita-nia labarik sira husi eskola ensinu pre-eskolár ba to’o ensinu sekundáriu sira atu bele akompaña de’it matéria sira ne’e liuhosi meiu komunikasaun sira,” katak Dulce de Jesus Soares, ba TATOLI, kinta (26/03/2020), iha salaun Ian Martin Mataudouro, Dili.

Notísia Relevante :Governu Deside Feriadu Extraordináriu ba Estudante Iha TL

Programa ne’e sei fó sai iha oras dader no sei fahe tuir ensinu pre-eskolár, ensinu baziku, sekundáriu no tékniku vokasionál.

Governante ne’e rekoiñese maske meiu ne’e la komprensivu liu maibé garante sei tulun estudante sira atu aprende durante feriadu.

Notísia Relevante :MESSK Fó Feriadu ba Estudante Universidade

“Ha’u husu ba inan-aman sira atu bandu oan labele sai ba li’ur maibé hakmatek iha uma hodi bele akompaña matéria ne’ebé sei fó sai iha meiu informasaun sira ne’e”, apela Dulce.

Notísia Relevante :Abríl Realiza Ezame Trimestrál Dahuluk

Jornalista : Tomé Amado

Editór       : Agapito dos Santos

1 KOMENTÁRIU

  1. Aii diak liu Eskola paradu total too fulan ida mk komesa aula normal keta kria tan kunfuzaun. Tnb hanoin nee vale ba vila deit no ema kbiit iha. Maibe koetadu ba areas remotas no ema nbe kbiit la iha hodi sosa televizaun ka radiu.

HAKEREK NO HATÁN

Please enter your comment!
Please enter your name here