Primeiru-Ministru, Taur Matan Ruak. Imajen Tatoli/ Egas Cristovão

DILI, 27 marsu 2020 (TATOLI) – Primeiru Ministru (PM), Taur Matan Ruak, informa daudaun ne’e Governu hein hela Prezidente Repúblika Dekreta Estadu Emerjénsia hodi kria regra limita movimentu populasaun sira.

Kontiúdu husi Estadu Emerjénsia, Xefe Governu dehan hanesan pontu jerál hodi limita ema-nian direitu ba liberdade no sirkulasaun, direitu ba reuniaun no manifestasaun, maibé sei la bandu totál ba sira ne’ebé presiza asesu ba saúde, komérsiu no presiza sosa nesesidade báziku.

“Ita tenke  aplika Dekretu Governu nian atu iha Estadu Emerjénsia ne’e ita aplika regra, atu ema labele konsentra barak liu hamutuk, eskola sira taka no reforsa Amo Bispu sira suspende misa no restu kontrola ba ita-nia sidadaun sira atu labele hasoru no halibur malu, maibé pelumenus ida-idak  bele sai asesu  iha fatin sira ne’ebé sira presiza hanesan Saúde, komérsiu ka presiza foti no sosa sasán ruma iha supermerkadu sira”, PM Taur hafoin enkontru semanál ho Xefe Estadu iha Palásiu Presidensiál, Bairro Pité, sesta ne’e.

Intensaun PM Taur hasoru malu ho Xefe Estadu, hodi informa katak Parlamentu Nasionál (PN) iha kinta (26/03) aprova Rezolusaun Estadu Emerjénsia.

Xefe Governu informa, iha Dekretu Governu ne’e, sei aplika regra atu sidadaun sira labele konsentra ka hamutuk, eskola sira taka hotu no reforsa husi parte Igreja nian ne’ebé suspende ona selebrasaun misa hotu.

Eis Prezidente Repúblika ne’e adianta, atividade ba loja sira sei kontinua loke, atu populasaun bele asesu sosa nesesidade báziku, maibé tenke tuir regra no medida seguransa atubele halo atendimentu ho populasaun sira.

“Governu sei ajuda sira (populasaun) atubele hetan asesu ba loja sira maibé ho kondisaun katak sé ema na’in-ida de’it maka bá, labele ba ema barak”, nia akresenta.

Ho nune’e, PM Taur afirma Governu  sei estabele regra atu orienta loja sira loke karik halo nusa maka bele hamutuk prevene COVID-19.

Nia afirma tan, Governu hahú prepara atu halo implementasaun iha loron hirak tuir mai, bainhira Prezidente Repúblika Dekreta Estadu Emerjénsia.

“Ami sei estabelese regra sira hotu para, aban no bain-rua hanesan ne’e forsa no polísia sira tun atu komesa halo ona sosializasaun, nune’e bele impoen regra sira ne’e”, nia realsa.

PM Taur refere liután, Governu esforsu atu haree no Kria kondisaun ba médiku no polísia sira atu halo servisu di’ak, maibé importante mak populasaun hotu tenke kontribui.

“Ami sei halo diseminasaun ba regra sira bainhira Prezidente Republika dekreta no tama ein vigór. Dadaun ne’e ami prepera hela Dekretu Governu”, nia katak.

Kona-ba funsionáriu sira, Xefe Governu dehan ba sira ne’ebé presiza kontinua sira ninia servisu hanesan plataforma Bayu-udan tenke la’o nafatin no Portu Tibar, maibé tenke iha rekezitu ba seguransa traballadór sira atu prevene COVID-19.

“Funsionáriu sira la’ós feriadu, maibé despensa no bele servisu iha uma ida atu sira hela iha uma atu ema barak haliburmalu, maibé kuandu Estadu presiza bolu filafali”, nia akresenta.

Entretantu, PN aprova pedidu Prezidente Repúblika ba Estadu Emerjénsia ho votu unanimidade a-favór hodi fó autorizasaun Xefe Estadu hodi Dekreta Estadu Emerjénsia.

Iha loron kinta (26/03), PN halo debate no fó biban ba deputadu ida-idak hodi halo deklarasaun votu nominál a-favor 64, kontra o abstensaun 0.

Nune’e mós, Konsellu Ministru aprova Proposta Estadu Emerjénsia ne’e iha loron segunda (16/03) no Prezidente Repúblika, Francisco Guterres “Lú Olo” aprezenta pedidu autorizasaun ne’e ba Parlamentu Nasionál iha tersa (24/03).

Tuir informasaun ne’ebé Agência Tatoli asesu katak Prezidente Repúblika sei Dekreta Estadu Emerjénsia iha sesta (27/03) no ninia validade hahú iha oras 00.00 iha loron sábadu (28/03) to’o oras 23.59 loron 23 abríl.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here