Diretora Jerál Prestasaun Saúde, Odete Viegas da Silva. Imajen/Felicidade Ximenes

DILI, 27 marsu 2020 (TATOLI)-Ekipa Task Force ba Asuntu Coronavirus ka COVID-19, iha kinta (26/03/2020) halo ona diskusaun ba pilár importante lima hodi prevene COVID-19 iha Timor-Leste. Ekipa Task Force ne’e lidera hosi Ministériu Saúde ho liña Ministeriál sira.

Diretóra Jerál Prestasaun Saúde, Odete Viegas da Silva hateten pilár importante lima ne’e maka dahuluk kona-ba planeamentu, monitorizasaun, avaliasaun. Daruak ko’alia kona- ba papel komunikasaun nia hodi involve komunidade.

”Datoluk haree liu kona- ba pontu de entrada vijilánsa epidemolojia, dahaat haree liu ba intervensaun klíniku diagnóstiku laboratóriu,”dehan, Odete ba Jornalista sira iha Palasiu Sinzas Caicoli, Dili kinta (26/03/2020).

Nia hatutan pilár ida ikus maka ko’alia kona-ba lojístiku, rekursu umanu no finanseira hodi la’o tuir ninia prosedementu atu ida-idak hala’o ninia funsaun ho di’ak liután.

“Agora daudaun diskute hela atu finaliza no elabora hamutuk ho planu sira ne’e atu nune’e bele sai ona dokumentu ofisiál ida hodi publika iha Jornal Repúblika,”tenik Odete.

Ekipa Task Force presiza estabelese komunikasaun ba malu no sei estabelese sentru emerjénsia hodi fó sai informasaun akuradu ba públiku liuhosi pajina Facebook Ministériu Saúde no meiu komunikasaun seluk tan.

Jornalista : Felicidade Ximenes

Editór      : Agapito dos Santos

HAKEREK NO HATÁN

Please enter your comment!
Please enter your name here