Diretora Jerál Prestasaun Saúde, Odete Viegas da Silva. Imajen/Felicidade Ximenes

DILI, 26 marsu 2020 (TATOLI)–Diretora Jerál Prestasaun Saude, Odete da Silva Viegas hateten, iha situasaun emerjénsia esforsu ne’ebé mak ekipa traballu no komisaun halo ona hodi lori ema ne’ebé mak mai hosi nasaun afetadu no hatama ona iha kuarentena nune’e ema hotu-hotu tenke koopera.

Maibé, nia hatutan, tanba situasaun emerjénsia komisaun tenke foti no kondisaun loloos ba kuarentena ba ema ida kuartu ida nune’e labele iha espasu ho ema seluk maibé situasaun obriga ema na’in rua tenke iha kuartu ida.

“Maibé situasaun emerjénsia ami tenke foti no kondisaun loloos ba kuarentena ba ema ida kuartu ida nune’e labele iha espasu ho ema seluk maibe situasaun obriga ema rua tenke iha kuartu ida”, dehan Diretora Jerál Prestasaun Saude, Odete da Silva Viegas, ba jornalista sira iha Palásiu das Sinças, Caicoli, Dili, ohin.

Nia dehan, se otél sira iha Dili Governu foti hotu kedas katak Governu bele tau ema sira ne’ebé mai hosi nasaun afetadu sira, entaun ida ne’e fasilita liutan serbisu.

“Governu mak iha poder hodi foti desizaun ba otél sira iha Dili nune’e hatama ema sira ne’ebé husi nasaun afetadu entaun hanoin bele fasilita di’ak liutan ami-nia serbisu,” nia dehan.

Dalaruma, nia haktuir, Governu tau sira iha kuarentena maibé sira rasik buka malu no konversa, ida ne’e loloos labele tanba moras ne’e perigozu entaun sira tenke evita no halo distánsia ba malu entre ema ida ho seluk.

Diretora ne’e husu atu ema ida-idak ka timoroan ida-idak iha konsiénsia katak moras ida iha ona Timor nune’e hamutuk para kuidadu no kontribui.

“Ita husu ema ida-idak tenke iha konsiénsia para tauk katak moras ne’e iha ita-nia rain ona, ne’ebé hatudu ida pozitivu ona. Entaun, ita buka atu oinsá bele kuidadu liután no husu mós atu labele fó sala de’it ba ekipa maibé ita hotu-hotu tenke kontribui. Tanba moras ne’e bainhira mai, nia la fihir ema ida,” nia esplika.

Tanba ne’e, nia husu nafatin, saida mak Governu halo ona husu para apoiu, tanba Governu mós daudaun ne’e husu nafatin parseiru sira hodi ajuda Timor-Leste.

Relasiona ho kustu otél balu iha Dili ne’ebé mak karun, diretora ne’e dehan, situasaun obriga no dilema boot ida katak atu hili dalan ida karun ka baratu.

“Dilema boot ida mai ita mak atu hili entre ida karun ka la karun ne’e. Maibé situasaun mak obriga ita tenke tau ema ne’ebé mak fila husi nasaun afetadu iha kuarentena no hein prosesu observasaun ba loron 14 nia laran,” nia tenik.

Nia dehan, Governu mak iha liu poder no ko’alia katak iha situasaun emerjénsia ema hotu-hotu koopera hodi labele hasa’e folin ida aas liu. Tanba ne’e, ba oin Governu tenke planeia kria fatin permanente ida di’ak liu atu nune’e poupa gastu sira ne’e .

“Ha’u hanoin harii sentru boot kuarentena no izolamentu boot ba infesaun nian iha ne’e. Ita gasta ba mós maibé sei iha ne’e duke ita ba selu otél ho osan boot ba loron 14 de’it. Ne’e hanesan lisaun ida ba ita atu ita hotu toma atensaun para ba oin ne’e, ita iha planu no preprasaun ne’ebé mak di’ak liu tanba moras ida ne’e la’ós ohin de’it maibé keta abanbainrua iha virus seluk tan mak mosu,” nia sujere.

Notísia Relevante:  Governu Rekonese Ekipamentu Prevensaun COVID-19 Limitadu

Jornalsita : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here