Governadór BSTL, Abraão de Vasconselos. Foto/Antonio Goncalves.

DILI, 27 marsu 2020 (TATOLI)—Governadór Banku Sentrál Timor-Leste (BCTL-sigla portugés), Abrão de Vasconselos hateten, situasaun COVID-19 obriga Governu tenke iha kapasidade salva setór ekonomia iha rai laran labele monu.

Governadór Banku Sentrál, Abrão Vasconselhos ko’alia asuntu ne’e bainhira hamutuk ho Ministra Finansa Ein-Ezersísiu, Sara Lobo Brites, hala’o audiénsia ho Komisaun C (Finansa Públika) ligadu ho pedidu urjénsia ba autorizasaun transferénsia estraordinária ba fundu petrolíferu, iha plenária Parlamentu Nasionál, sesta ne’e.

Governadór Banku Sentrál konsidera situasaun agora ne’e oin seluk, tanba ne’e mak Banku Sentrál iha inisiu semana ida-ne’e halo prosesu konsulta ho xefe ezekutivu sira hosi banku komersiál hotu-hotu nian iha opsaun.

Iha diskusaun entre xefe ezekutivu hosi banku komersiál sira diskute no garante serbisu bánkaria báziku ne’e tenke fornese nafatin no presiza atu haree pelu menus medida saida mak bele introdus iha parte krédiu ninian.

“Banku sentrál haree númeru kréditu ba setór privadu ne’e ho montante iha kiik-oan millaun $250 durante períodu naruk nia laran. Banku Sentrál la preokupa ida-ne’e maibé agora ho situasaun espesífiku ida hanesan (COVID-19) ne’e, ha’u hanoin ita hotu nia relevánsia ne’e determina hosi ita-nia kapasidade tane (salva) para ita-nia setór privadu sira labele monu,” Governadór Banku Sentrál informa liuhosi plenária, ohin.

Governadór Banku Sentrál, Abrão Vasconselhos hateten iha fulan rua ka tolu oin mai Diresaun Jerál Estatístika sei publika dadus balun ha’u hanoin tanba ita la ko’alia kona-ba inflasaun, presaun posibilidade no presaun inflasaun.

“Maibé ita ko’alia karik setór balu iha ita-nia ekonomia ne’e eziste ka la eziste ka ita halo buat ne’e foun fali. Tanba ne’e medida ne’ebé Banku Sentrál nia proposta lubuk ida ba Governu atu hahú diskute kona-ba programa saida mak atu implementa, karik Banku Sentrál bele kontribui,” nia dehan.

Nia fó hanoin, katak presiza fornese meiu atu garante sirkulasaun ekonomia kontinua funsiona importante tebes.

“Ida-ne’e kritikál tebes iha momentu ida-ne’e, Estadu fundu semana rua ne’e sentru pandemik ho meiu no rekursu hotu-hotu ne’ebé sira iha, ha’u hanoin Timor-Leste mós la esklui iha ne’e, mezmu ita taka dalan hotu-hotu mabé ha’u hanoin ita mós iha risku hanesan,” nia dehan.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here