Trabailadores sira husi Australia nebe mai ho aviaun airnorth wainhita to iha aeroportu Nicolao Lobato,Karta 25 Marsu 2020.Imajen/Antonio Goncalves

DILI, 26 marsu 2020 (TATOLI)-Ministériu Saúde tuir planu iha kinta ohin ka sesta (27/03/2020) sei muda ona Timoroan hamutuk 34 hosi kuarentena provizóriu iha INAP Comoro, Dili bá otél balun hodi kumpre desizaun governu durante loron 14.

Timoroan 34 ne’e iha kuarta (25/03/2020) fila hosi Austrália ho Aviaun Air North hodi hela iha edifísiu Institutu Nasionál Administrasaun Públika Comoro Dili.

Notísia Relevante :Timoroan 34 Hosi Austrália Hela iha INAP

Diretóra Nasionál Apoiu Moras, Ministériu Saúde, Josefina Clarinha João rekoiñese INAP laiha kondisaun di’ak atu koloka sidadaun hirak ne’e tanba ne’e maka sira sei muda bá otél iha semana ida ne’e.

Notísia Relevante :Timoroan 34 Fila Hosi Austrália Laiha Sintoma COVID-19

Ministériu Saúde ho liña ministeriál dadaun ne’e kontrata ona otél Audian no Novo Horizonte Metiaút atu sidadaun sira ne’ebé foin fila hosi estranjeiru atu hela obrigatóriu durante loron 14 hodi prevene COVID-19.

Notísia Relevante :Ema Na’in 102 Kuarentena Iha Novo Horizonte

“Ita konsidera ita-nia maluk Timoroan na’in 34 iha Kuarentena INAP hela iha kondisaun grave ita kontaktu malu atu hasai sira husi INAP ba Fali Otél,”dehan Nia ba TATOLI, kinta (26/03/2020) iha INAP Comoro.

Maibé nia seidauk esplika otél ida ne’ebé maka sei koloka okupante sira ne’e bá hela tanba sei iha prosesu hela.

Notísia Relevante :MS Seidauk Kontrata Kuarentena iha Otél Audian

Iha parte seluk, José Gonsalve hanesan okupante kuarentena INAP, informa fatin ne’e laiha kondisaun di’ak tanba falta bee moos, laiha sabaun fase liman, laiha kolxaun ho kondisaun di’ak, rai rahun no seluk tan.

“Sira lori ami mai iha ne’e atu prevene ami la’ós lori ami mai atu simu fali moras. Ami kumpre desizaun governu nia, maibe labele husik ami toba de’it iha fo’er nia laran,”nia kestiona.

Notísia Relevante :MS Presiza Kria Kondisaun iha Kuarentena Tibar

Tanba ne’e, nia suzere di’ak liu MS fó autorizasaun ba sira atu kuarentena iha ida-idak nia uma depois maka hetan kontrola hosi ekipa vijilánsia Ministériu Saúde nian.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here