Kuarentena Tibar. Imajen Tatoli/Cipriano Colo

DILI, 26 marsu 2020 (TATOLI) – Timor-oan hamutuk 252 ne’ebé mai husi nasaun afetadu husi COVID-19, daudaun ne’e iha ona kuarentena haat hanesan Tibar, Otél Horizonte, Otél Audian, Institutu Nasionál ba Administrasaun Públika (INAP), ne’ebé estabelese husi Ministériu Saúde (MS).

Tuir dadus ne’ebé ekipa Agência Tatoli rekolla iha terenu, husi totál ema na’in-252 kompostu husi kuarentena Tibar na’in-34, Kuarentena INAP 34, otél Horizonte 102 no otél Audian 82.

Aleinde ne’e, MS estabelese mós kuarentena iha Fronteira Batugade maibé to’o oras ne’e sei mamuk tanba foin maka halo instalasaun.

Kuarentena haat ne’e Governu liuhusi MS estabelese, atu fásil kontrola sidadaun sira liuliu konsulta médiku durante loron 14, hafoin laiha sitoma COVID-19 bele fila ba uma no kuandu iha sintoma bele foti amostra raan no analiza ne’ebé deteta ona positivu maka sei bele muda ba fatin izolamentu.

Ho nune’e, dadaun ne’e ekipa médiku halo hela observasaun no vijilánsia ba ema na’in-252 iha kuarentena haat ne’ebé estabelese ona.

Timor-oan husi nasaun afetadu ba COVID-19, lamenta ho kondisaun fatin kuaretena tanba la nesesáriu atu hela.

“Ami hanoin kuaretena ne’e kondisaun di’ak atu ami hetan moras karik labele hada’et ba ema seluk, maibé realidade ami to’o iha ne’e laiha ema ida mak tau matan mai ami no sira lori ami mai soe hela to’o agora”, dehan Timor-oan ne’ebé hanesan traballadór Seasonal Workers Program (SWP) iha Austrália, Sidonio Soares de Jesus ba Agência Tatoli, kinta ne’e.

Nia adianta, kondisaun kuarentena la favorese tanba na’in-haat ka lima toba hamutuk.

Tuir Sidonio Soares, kondisaun kuaretena iha INAP laiha kondisaun di’ak tanba sira toba iha rai-rahun.

“Agora problema ida tan maka ami simu ona informasaun husi doutora sira komesa ohin loron de’it, família bele lori sasán  bazíku hanesan sasán atu haris, maibe husi parte seguransa la hatán no la autoriza ne’ebé ami toba ho kondisaun la di’ak”, nia lamenta.

Antes ne’e, Diretora Nasionál Kontrolu Moras, Ministériu Saúde, Josefina Clarinha João, hateten  iha situasaun emerjénsia hanesan ne’e MS liuhosi ekipa vijilánsia ba COVID-19 kontinua esforsu aan atu koordena no kolabora ho ekipa sira iha Aeroportu Comoro atu aselera atendementu ho di’ak ba sidadaun husi nasaun afetadu sira.

“Ita mós rekursu umanu no transporte limitadu ne’ebé tenke sai no ita nia sasukat atu iha pasensia hodi hein prosesu, nia salienta.

Diretora ne’e dehan, ekipa Diresaun Nasionál Kontrolu Moras mak iha resposabilidade ba timor-oan sira ne’ebé mai husi nasaun afetadu hodi lori ba kuarentena.

Entertantu, Tuir dadus husi Ministériu Saúde ne’ebé  Agência Tatoli asesu iha Portal ofisiál Palácio de Cinzas, ne’ebé atualiza kazu COVID-19 hahú husi loron 5 to’o 25 marsu ne’e, timor-oan husi nasaun afetadu COVID-19 ne’ebé kuarentena iha uma  ka pasa ona kuarentena durante loron 14 hamutuk 149 no sei akompaña 297 ho totál na’in-446, iha kuarentena A na’in-65, kuaretena B hamutuk na’in-99, kuarentean C na’in-30 no kuaretena D na’in-38 ho totál hamutuk 708.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here