Ministru Reforma Lejizlativa no Asuntus Parlamentares Fidelis Manuel Leite Magalhães Akompaña husi Sekretáriu Estadu Komunikasaun Sosiál, Merício Juvinal dos Reis 'Akara'. Imajen/Egas Cristóvão

DILI, 26 marsu 2020 (TATOLI) – Sekretáriu Estadu Komunikasaun Sosiál (SEKOMS), Merício Juvenal dos Reis Akara, konsidera mídia hanesan parseiru estratéjiku hodi kombate Covid-19 liuhosi dalan fó informasaun loloos no kredivel ba públiku.

“Governu apresia mídia sira-nia servisu no esforsu durante ne’e hodi kontribui divulga informasaun loloos ba públiku tomak kona-ba COVID-19”, Akara hateten liuhosi komunikadu ne’ebé TATOLI asesu loraik ne’e.

Membru governu ne’e afirma kontinua garante liberdade imprensa tuir konstituisaun haruka.

Deklarasaun ne’e hato’o hodi hatán ba preokupasaun husi mídia sira ne’ebé durante ne’e hasoru difikuldade hodi asesu informasaun loloos kona-ba pandemia Virus Corona Ka COVID-19 no mós iha tendénsia halo intervensaun ba iha editorial instituisaun mídia sira husi Ministériu Saúde (MS).

SEKOMS fó hanoin ba instituisaun governu hotu atu kompriende didi’ak knaar prinsipál mídia no jornalista sira no husu ba entidade hotu tenke kolabora hodi fasilita mídia sira asesu ba informasaun ne’ebé loloos hodi serví ba interese públiku tomak.

Governante ne’e mós husu ba instituisaun governu sira atu labele halo intervensaun ba independénsia editorial mídia sira hodi garante divulgasaun informasaun ne’ebé loloos no kredivel kona ba COVID-19, nune’e hanesan mós meius hodi kontribui kombate informasaun falsa sira (HOAX) no evita pániku iha sosiedade.

SEKOMS mós husu ba mídia no jornalista hotu atu mantein kumpre kódigu étika jornalizmu iha pratika loro-loron hodi asegura informasaun kredivel no konfiavel.

SEKOMS mós apresia ho sujestaun husi parte hotu hodi harii Sentru Mídia ba COVID-19, nune’e SEKOMS sei kolabora ho MS hodi haree mekanizmu estabelesimentu Sentru Mídia. (ki)

HAKEREK NO HATÁN

Please enter your comment!
Please enter your name here