Logotipu SAMES. Imajen/Espesiál

DILI, 26 marsu 2020 (TATOLI)-Servisu Autónomu medikamentu no Ekipamentu Saúde (SAMES) iha ona planu sei sosa ekipamentu  ba prevensaun Coronavirus ka COVID-19 hanesan roupa protesaun, maskra no luvás ba pesoál saúde sira hodi halo servisu.

Coronavirus

Diretóra Ezekutivu Interina SAMES, Emelia de Jesus Alves Mendonça hateten maske iha ona planu maibé sei hein aprovasaun orsamentu adisionál hosi Parlamentu Nasionál hodi ezekuta ba item ne’e.

”Tempu badak SAMES tenke sosa ekipametu maibé orsamentu mak limitadu tebes,”dehan Emelia de Jesus Alves Mendonca ba Agência TATOLI, iha SAMES Kampung-Alor, kinta (26/03/2020).

Nia fiar katak PN sei fó atensaun sériu ba problema COVID-19 hodi aprova orsamentu  ba SAMES.

”Ita hein orsamentu ne’ebé Governu estadu halo diskusaun iha parlamentu nasionál ita garante katak tempu badak ita hetan orsamentu sira ne’e hodi sosa ekipamentu ba COVID-19,”tenik tan.

Durante ne’e, Governu liuhosi Ministériu Finansa  kada-fulan aloka orsamentu rihun $ 300 ba SAMES, tanba ne’e ba fulan-abríl nian sei uza  rihun $ 100 hodi sosa ekipamentu ba prevensaun coronavirus.

Nia hatutan, hafoin  PN aprova ona orsamentu ne’e,   SAMES sei hahú loke tenderizasaun ba kompaña sira hodi forñese fasilidade hirak ne’e.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here