Otél Novo Turismo Resort & Spa. Imajen/TripAdvisor

DILI, 26 marsu 2020 (TATOLI)Sales And Marketing Manager, Denise Mella, hateten Otél Novo Turismo daudaun ne’e hetan rendimentu tun tanba vizitante husi estrajeiru menus.

“Ami-nia rendimentu agora ne’e tun liu, tanba ne’e maka ami agora komesa atu enkontru fali atu nune’e ami ninia funsionáriu sira bele servisu hanesan bain-bain”, nia dehan ba Agência Tatoli, iha ninia knaar fatin, Otél Novo Turismo, kinta ne’e.

Nia haktuir, situsaun ne’e akontese hahú iha fulan-marsu nia-laran, tanba vizitante sira komesa laiha no eventu komesa menus.

“Fulan-rua rendimentu ami sei hetan di’ak tanba sei iha eventu barak, maibé iha marsu komesa eventu laiha no kauza COVID-19 malae sira mós ladún mai tanba ita-nian Governu hasai ona rezolusaun ida katak bandu ema estrajeiru tama  mai no ita labele organiza eventu hodi halo ema barak iha fatin ida tanba bele kauza vírus ne’e, tanba ne’e ami ninia rendimentu tun”, nia relata.

Nune’e, responsável ne’e kompara rendimentu normál bainhira seidauk iha notísia kona-ba Coronavírus, liga ho Timor-Leste sei sai uma-na’in ba jogu desportivu Komunidade País ho Lian Portugés (CPLP, sigla portugés), vizitante sira booking kuartu loron ida kuartu 20 to’o 30, no dalaruma ema estranjeiru okupa otél nia kuartu porsentu 80, maibé agora menus.

“Agora vizitante tun to’o porsentu 90 to’o bele porsentu 98, ho situsaun ne’e ami bele implenta resesaun tempu servisu no saláriu sei tuir ida ne’e. Kuandu sira servisu ho oras oituan, entaun saláriu tenke tuir nune’e. Maibé tenke haree ba nia kondisaun oinsá karik situsaun ne’e kontinua la’o, maka ami labele deside rasik kona-ba saláriu ne’e, tanba ami ninia  patraun bo’ot  maka ami sei deside liuhosi enkontru”, nia adianta.

Tuir nia, iha fulan-marsu sira ninia saláriu sei normál maibé iha abríl ne’e maka presiza haree tanba ne’e sei iha enkotru atu haree posibilidade ba oin nian.

Denise Mella hateten, maske enfrenta situasaun nune’e maibé la hanoin atu taka otél ne’e no funsionáriu sira sei kontinua halo servisu bain-bain.

“Maske ami ho situasaun nune’e, maibé ami kontinua la’o normál no ami seidauk hanoin atu taka. Ami rekoñese agora hetan vizitante menus loron ida dalaruma laiha liu, maibé la hanoin atu taka”, nia subliña.

Nia refere liután, kona-ba rendimentu la’ós Otél Novo Turismo maka daudaun tun maibé Restaurante El Legendario mós tun, dalaruma loron ida hetan ema ida ka rua de’it no bele mós dalaruma loron ida laiha liu.

“El Legendario mós rendimentu menus, as vezes dader to’o kalan ne’e ema rua to’o tolu de’it maka mai vizita la hanesan uluk, tanba menus eventu ho situasaun moras Coronavírus ne’e ita  prevene buat rame tanba ne’e mós halo rendimentu tun”, nia informa tan.

Tanba ne’e, parte otél sei halo redusaun ba tempu servisu nian ne’ebé servisu normalmete ne’e oras 8 redús ba oras 4 servisu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here