Imajen Tatoli/Osória Marques

DILI, 26 marsu 2020 (TATOLI)–Rede Feto Timor-Leste nia serbisu mak atu koordena no fasilita grupu traballu advokásia hamutuk ho parseiru, hodi halo advokásia, monitorizasaun, sosializasaun ba kualker asuntu prioridade ne’ebé mosu, inklui advokásia atu halo prevensaun ba COVID-19 ne’ebé agora daudaun sai ameasa boot ba ema.

Prezidente Rede Feto, Judite Dias Ximenes informa, Rede Feto hala;o distribuisaun material prevensaun COVID-19 hanesan sasan sira uza ba fse-liman nian ba uma-kain 1000 iha munisipiu sia (9) inklui RAEOA.

“Ho situasaun COVID-19, Rede Feto Timor-Leste fó sai ba públiku no fó konesementu ba autoridade sira, liuliu PNTL, Xefe Suku no konsellu suku atu ita bele serbisu hamutuk hodi halo prevensaun ba COVID-19 liuhosi halo distribuisaun materiais hanesan fase liman nian iha uma-kain 1000 iha Munisípiu 9 inklui RAEOA,” Prezidente Rede Feto, Judite Dias Ximenes, informa ba jornalista hafoin hala’o konférensia imprensa relasiona ho Covid-19, iha salaun Rede Feto, Obrigado barak, Dili, ohin.

Nia haktuir, Munisípiu 9 hanesan Ainaro responsabiliza hosi Fundasaun Harii Moris Foun (HMF), Bobonaro responsabiliza hosi Fundasaun Haburas Moris (FHM), Covalima, responsabiliza hosi Fundasaun Leno Dalan ba Komunidade (LEDAK), Ermera responsabiliza hosi Fundasaun Esperanca (FE), Lautem responsabiliza hosi PRADET-Timor-Leste, Liquisa responsabiliza hosi Fundasaun Moris Foun (FMF).

Manatuto responsabiliza hosi Movimento Feto Foin Sae (MOFFE-TL), Reziaun Administrativa Espesial Oecusse Ambeno (RAEOA) responsabiliza hosi Fundasaun Esperanca Encalave Oecusse (FEEO) no Viqueque responsabiliza hosi Kolega da Paz (KDP) no Dili responsabiliza hosi FOKUPERS, CNSR, FFKSH no mós sekretariadu Rede Feto nian.

“Ami husu PNTL no konsellu suku nia kolaborasaun no apoiu ba realizasaun atividade fahe materiais fase liman neebé sei halao iha uma-kain atus-ida (100) kada Munisípiu no mós RAEOA,” nia relata.

Nia hatutan, tanba ohin loron mundu hasoru pandemia COVID-19, Timor-Leste mós la sees hosi situasaun ida ne’e tanba Timor iha ona kazu pozitivu ida ne’ebé alerta husi Organizasaun Saúde Mundiál (OMS) ho Ministériu Saúde (MS).

Prezidente hateten, RFTL hanesan organizasaun sumbriña ba organizasaun feto iha Timor-Leste rejistrada 44, ho nia funsaun mak fasilita, koordena no hakbiit ho knaar nune’e promove igualidade jéneru liuhosi advokásia, rede serbisu, kapasitasaun, hametin instituisaun no akontabilidade.

“Tanba ne’e, atu asegura Feto Timor-Leste livre duni husi violénsia no forma diskriminasaun hotu-hotu, hodi partisipa efetivamente iha prosesu dezenvolvimentu ne’ebé inkluzivu no sustentável,” nia dehan.

Nia dehan materiál hirak ne’e hetan apoiu hosi Governu Nova Zelándia liuhosi ninia Embaixada iha Timor-Leste.

Jornalista : Osória Marques

Editór    : Cancio Ximenes

HAKEREK NO HATÁN

Please enter your comment!
Please enter your name here