Prezidente Komisaun A Parlamentu Nasionál, Carmelita Caetano Moniz. Imajen/dok.TATOLI

DILI, 26 marsu 2020 (TATOLI)—Deputada Bankada Parlamentár CNRT, Carmelita Caetano Moniz, preookupa ho implementasaun estadu emerjénsia ne’e tanba ne’e presiza haree didi’ak nune’e labele iha disturbasaun entre autoridade no sidadaun sira.

Deputada CNRT ne’e esplika iha implementasaun lei númeru 3/2008 iha artigu 16 númeru 1 hatete katak se Parlamentu Nasionál konfirma autorizasaun ba Prezidente Repúblika tenke forma ho lei ida no forma ho lei ida ne’e mós tuir mensajen ne’ebé Prezidente Repúblika hato’o mai katak deklara de’it estadu emerjénsia.

Nia argumenta, tuir lei hatete katak estadu emerjénsia de’it entaun restrinje ema-nia diretu ho parsiál la’ós totál.

Nia hatutan, atu restrinse ema-nia direitu ne’e tenke hakru’uk tuir kritériu hirak-ne’ebé establesidu iha artigu 15 númeru 1 katak tenke halo karaterizasaun no fundamentasaune estadu ne’ebé deklara iha ámbitu territoriál, asaun, espesifikasaun diretu no garantia.

“Tanba ne’e tenke tau iha desklarasaun estadu emerjénsia ne’e. Ne’ebé, Primeiru-Ministru tenke esplika mai ami medida saida mak ita tenke foti, liuliu ligadu ho ekonomia nasaun nian, ba komersiante sira. Keta halo, ita hanoin hanesan ne’e, ita taka hotu tiha loja dentru loron 30, ita ta’uk ema mate tanba Coronavirus maibé parte seluk ema mate tanba hamlaha tanba la iha hahan sufisiente iha uma,” dehan Carmelita Caetano Moniz liuhosi plenária Parlamentu Nasionál, kinta ne’e.

Tanba ne’e, Deputada Carmelita Caetano Moniz fó hanoin katak tenke transforma mensajen Prezidente Repúblika nian ba lei nune’e implementasaun hosi autoridade sira dentru emerjénsia labele halo fali perturbasaun ba buat seluk.

“Ne’ebé, ita haree didi’ak mak ninia legalidade no implementasaun, ho nune’e labele fó impaktu ba sósiu-ekonómiku,” dehan Deputada Carmelita Caetano Moniz.

Notísia Relevante: Governu Tenke Preparadu Ba Senáriu At Liu Hasoru COVID-19

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here