Primeiru-Ministru, Taur Matan Ruak, hamutuk ho ninia membru sira iha Parlamentu Nasionál (PN), halo diskusaun kona-ba Estadu Emerjénsia Relasiona ho Covid-19. Imajen Tatoli/ Egas Cristovão

DILI, 26 marsu 2020 (TATOLI)—Maske seidauk tama ba votasaun maibé Xefe Bankada Parlamentár sira iha Parlamentu Nasionál apresia ba pedidu Prezidente Repúblika relativu atutorizasaun hodi deklara estadu emerjénsia iha territóriu nasionál.

Prezidente-Repúblika, Francisco Guterres “Lú Olo” aprezenta pedidu autorizasaun ne’e ba Parlamentu Nasionál iha loron tersa (24/3/2020).

Xefe Bankada parlamentár FRETILIN, Deputadu Aniceto Guterres hateten, COVID-19 halo ema barak mate iha mundu no Timor-Leste sei la sees hosi situasaun ida ne’e.

Aniceto Guterres  konsidera situasaun ne’e presiza medida efetivu hodi halo prevensaun nune’e moras ne’e labele iha espansaun ba sosiedade tanba virus ne’e hanesan pandemia foun iha mundu.

Xefe Bankada FRETILIN ne’e fó ezemplu, nasaun vizinu Novazelandia, Indonézia hola drástiku liuhosi estadu memerjénsia.

“Timor-Leste labele sees hosi situasaun defisil ka realidade COVID-2019, tanba Timor-Leste tenke prontu hatán no halo funu hasoru COVID-19. Bankada Fretilin fó apoia tomak ba medida ida-ne’e. Peritu sira iha mundu rekoñese modida ida-ne’e mak opsaun di’ak liu,” informa Xefe Bankada FRETILIN.

Aniceto afirma, medida prevensaun ne’e Vitename no Xina halo ona liuhosi estadu esesaun ne’e.

“Tanba ne’e ita iha Timor ema balun hanoin situsaun ne’e normal hela, ita keta haluha, di’ak liu ita prevene do que tarde. Tanba ita-nia sistema saúde mós la di’ak entaun prevensaun importante tebes atu kombate virus ida-ne’e. Ita presiza halo prevensaun sériu ba propagasaun sériu ida-ne’e,” nia dehan.

“Estadu emerjénsia dalan-ida atu Timor-Leste tenke hola. Ho nune’e FRETILIN deklara estadu emerjénsia tenke hola duni. FRETILIN hakarak apela ba povu hotu apoia governu kombate COVID-19”.

Xefe Bankada Parlamentár CNRT, Duarte Nunes, konkorda ho Primeiru-Ministru, Taur Matan Ruak, atu tau enérjia no hanoin hamutuk kombate COVID-19.

Duarte Nunes konkorda ho Primeiru-Ministru, katak órgaun estadu tau enerjia no hanoin hamutuk hodi ultrapasa situasaun ida-ne’e.

“Hanesan ba ita-nia ukun na’in sira ita presiza tau esforsu hamutuk bele ultrapasa. Ita iha ona kazu ida, embora tuir informasaun ne’ebé ami hetan bem kontroladu, la signifika ita la fó atensaun, ameasa iha fatin barak,” nia dehan.

“Buat ida ke relamente, sé-se’ mak tama mai tenke kuarentena, so ke ita-nia kondisaun di’ak, balun kuarentena iha uma. Uma ne’e la iha garantia katak ema ne’e la hada’et ba sira seluk tanba kuandu iha kuanrentena ne’ebé tau ne’e kontroladu no saúde sira mós sei kontrola. Ami espera katak ita tau hanoin hamutuk hasoru situasaun ne’ebé atu mai ne’e,” Xefe Bankada CNRT nia intervensaun iha debate estadu emerjénsia ne’e.

Xefe Bankada Parlamentár KHUNTO, António Nobre Tilman hateten, tempu to’o ona timoroan hamutuk kombate KOVID-19.

“Ami hato’o apresiasaun ba pedidu de emerjénsia ne’e,” dehan Xefe Bankada KHUNTO.

Vise-Xefe Bankada Parlamentár PLP, Francisco Vasconselos hateten, Timor-Leste tarde uitoan maibé sei iha oportunidade atu kombate COVID-19.

“Timor-Leste seidauk kona ne’e kestaun tempu de’it, tanba da’et ne’e ema ba ema entaun preokupasaun estadu Timor-Leste nian importante tebes. Meiu ida-ne’ebé ita presiza halo mak prevensaun. Situasaun ne’e alastra ba mundu tomak,” informa Deputadu Franscico Vasconselos.

Xefe Bankada Parlamentár Partidu Demokrátiku (PD), António da Conçeição, situasaun ida-ne’e obriga nasaun nia unidade nasionál.

“Ohin debate kona-ba estadu emerjénsia, bankada PD apoia koletiva ida-ne’e atu lori konfiansa fila-fali ba povu, rona estadu emerjénsia sidade Dili hakmatek. Ohin Timor-Leste presiza lian ida hasoru pandemia ida-ne’e. Iha hamutuk lian ida hodi populasaun iha sosiedade bele moris,” nia dehan.

Xefe Bankada UDT/FM, Francisco Xavier Carlos hateten, VOVID-19 ne’e hatudu tenke hamutuk kombate pandemia ida-ne’e.

Xefe Bankada Parlamentár PUDD, António de Sá Benevides hateten, fó fiar ba Governu hasoru situasaun ida-ne’e.

“Bankada PUDD fó apoia tomak ba estadu emerjénsia ida-ne’e,”  informa Deputadu António de Sá Benevides.

Deputadu PD, Mariano Assanami Sabino, apresia komitmentu ema hotu-hotu hodi hamosu estadu emerjénsia.

Assanami rekomenda bainhira situasaun mosu duni deputadu no membru governu, líder polítiku sira tenke hola parte iha iha liña oin (front line).

Notísia Relevante: Ohin, Prezidente Repúblika Haruka Proposta Estadu Emerjénsia ba PN

Jornalista  : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here