Parlamentu Nasional,Imajen/Antonio Goncalves

DILI, 26 marsu (TATOLI)—Reprezentante Povu iha Uma Fukun Parlamentu Nasionál (PN), husu ba Governu liuhosi Ministériu Saúde (MS), atu fó loloos informasaun ba mídia kona-ba COVID-19.

Deputada Bankada Parlamentár KHUNTO, Olinda Guterres, husu Vise-Minitra Saúde, fó informasaun loloos ba mídia liuhosi jornalista sira.

“Ha’u husu Vise-Ministra atu fó informasaun loloos ba ita-nia jornalista sira tanba ami presiza hetan informasaun ida-ne’ebé detallu kona-ba COVID-19 ne’e. Dalaruma ita-nia povu hakarak rona informasaun maibé jornalista sira hakbesik ita boot la fó komentáriu, ida-ne’e mak preokupasaun ba povu,” Deputada Olinda Gutreres, levanta kestaun ne’e iha ámbite debate pedidu estadu emerjénsia, iha plenária Parlamentu Nasionál, kinta ne’e.

Deputada Olinda fó hanoin ba Vise-Ministra katak la hatán pergunta jornalista sira entaun fó ba tékniku sira esplika detallu ba mídia nune’e povu bele asesu.

Deputada Olinda Guterres mós preokupa ekipamentu protesaun ba jornalista sira tanba moras ne’e perigu tebes.

Iha parte seluk Deputada Bankada Parlamentár FRETILIN, Lídia Norberta Martins husu governu tau atensaun ba mídia sira tanba sempre atualiza informasaun ba publiku.

“Se bele SEKOMS kria kondisaun ba sira hodi nune’e ita bele hatene prevensaun COVID-19 ne’e ita prevene duni ho meius ne’ebé maki ha para nune’e númeru pozitivu-ida ne’e labele aumenta tán,” Deputada Lídia fó hanoin ba governu.

Nune’e mós Deputada Bankada Demokrátiku (PD), Elvina Sousa, husu governu fasilita mós ekipamentu protesaun ba jornalista sira.

“Jornalista sira mós tenke presiza ekipamentu protesaun nune’e sira bele halo serbisu ho di’ak liu,” Deputada Elvina fó hanoin.

Deputadu Bankada Parlamentár KHUNTO, Luis Roberto, fó hanoin ba governu katak jornalista sira mós hola-parte iha liña frente tanba ne’e governu presiza tau atensaun ba ida-ne’e.

“Kuandu buat ne’e akontese ha’u haree jornalista sira mak sei mate uluk. Tanba ne’e, ha’u husu governu fasilita ekipamentu protesaun ba sira, tanba povu presiza informasaun kona-ba COVID-19 ne’e,” nia fó hanoin.

Notísia Relevante: KHUNTO-PD Husu Governu Fasilita Ekipamentu Protesaun Ba Jornalista Sira

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here