Primeiru-Ministru, Taur Matan Ruak, hamutuk ho ninia membru sira iha Parlamentu Nasionál (PN), halo diskusaun kona-ba Estadu Emerjénsia Relasiona ho Covid-19. Imajen Tatoli/ Egas Cristovão

DILI, 26 marsu 2020 (TATOLI) – Primeiru Ministru, Taur Matan Rauk, konsidera atu prevene no kombate COVID-19 labele hada’et ba ema barak, Timor-Leste presiza aplika Estadu Emerjénsia hodi limita movimentasuan populasaun sira nian.

“Ita nia Deputadu sira halo ona desizasaun ka vota ho unanimidade hodi autoriza Prezidente Repúblika dekreta Estadu Emerjénsia iha ita-nia rai. Ita halo tan istória ida no sai ezemplu ida di’ak loos ba ita-nia sidadaun sira no hatudu katak iha momentu ne’ebé ita-nia país no ita-nia povu hetan risku no problema ba nia moris ita hamutuk”, tenik PM Taur iha Parlamentu Nasionál, kinta ne’e.

Ho nune’e, Xefe Governu apela ba populasaun tomak atu koopera ho autoridade kompetente sira hodi bele prevene-an husi Coronavírus ka COVID-19.

“Ha’u hakarak apela ba populasuan sira atu  koopera, liuliu inan-aman sira ne’ebé iha oan no família iha rai-li’ur kuandu mai labele subar sira maibé haruka atu besik ba ajente saúde sira, ita-nia polísia no ita-nia forsa armada ne’ebé besik atu kanaliza sira ba sentru saúde sira atubele hadook-an husi vírus ne’e husi familia, komunidade no nasaun”, Líder Ezekutivu ne’e apela.

Vantajen husi Estadu Emerjénsia, tuir PM hanesan dalan di’ak atu impede Coronavírus labele da’et husi ema ba ema.

“Ita hetan vantajen tanba ita-nia movimentu ne’e limita. Tanba moras ida-ne’e da’et husi ema ba ema, ne’ebé kuandu ita implementa Estadu Emerjénsia maka ita halo limitasaun movimentu, hanesan dalan di’ak atu ita impede vírus ne’e labele da’et. Tanba ne’e, hanesan mós ahi-lakan ita tenke hamate, se ita husik nia sei lamate”, Xefe Governu afirma.

Prinsípiu Estadu Emerjénsia, Eis Prezidente Repúblika reforsa, atu limita movimentasaun populasaun, maibé aplikasaun no médida sira ne’e tuir evolusaun situasaun nian, tanba la’ós bandu totál atu sai.

“Ita la’ós aplika kedan dehan labele sai totál tanba sidadaun sira presiza ba klínika, ospitál no sosa buat ruma. Maibé sei iha regra atu hotu-hotu labele ba halibur malu no labele ba besik malu,” PM Taur akresenta.

Kona-ba medida Estadu Emerjénsia, Xefe Ezekutivu ne’e adianta, Governu sei fó hatene hafoin kria tan dekretu-lei atu prepara kondisaun hotu atu implementa Estadu Emerjénsia hafoin Prezidente Repúblika dekreta.

“Parlementu sei haruka ba Prezidente Repúblika atu dekreta, maibé Governu sei prepara kondisaun hotu atu halo implementasaun”, nia akresenta.

Governu sei halo esforsu hotu atu ajuda instituisaun nesesáriu sira bainhira iha implementa Estadu Emerjénsia.

“Ami sei halo medida atu ajuda mídia no institusaun sira ne’ebé nesesáriu, inklui sei iha posibilidade ajuda médiku, jornalista no seguransa sira hodi proteje-an atu tau matan no halo kobertura ba ita-nia sidadaun sira ne’ebé afetadu. Ami sei halo buat hotu atu ajuda”, nia salienta.

Xefe Governu observa, nasaun barak sofre COVID-19 ne’e tanba sira la toma medida lais atu halo izolamentu obrigatóriu no intervensaun ema-nia, tanba ida-ne’e nu’udar forma di’ak atu kombate moras ne’e.

“Ita atu kombate moras ne’e maka limita ita-nia movimentu sira, ida-idak iha nia fatin no kuandu sai ne’e nesesáriu de’it, labele la’o tun la’o sa’e hanesan bainhira mate iha, ita ba tuur hamutuk tanba ita lahatene se mak iha ona moras ne’ebé ita prevene atu ema labele moras no mate barak”, Xefe Governu subliña.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here