DILI, 26 marsu 2020 (TATOLI) – Liuhosi apresiasaun Estadu Emerjénsia iha plenária Parlamentu Nasionál (PN) kinta ne’e, Primeiru-Ministru (PM), Taur Matan Ruak rekoñese katak sistema saúde Timor-Leste mínimu tebes, tanba ne’e presiza atu dekreta Estadu Emerjénsia nune’e bele halo prevensaun ba pandemia COVID-19.

Xefe Governu konsidera, momentu ne’e oportunu atu deskute Estadu Emerjénsia, nune’e Prezidente Repúblika bele dekreta.

Nune’e mós, haree ba país barak maka konsidera pandemia vírus ne’e hanesan funu, tanba ne’e sira konsidera presiza medida atu kombate liuhosi esforsu nasionál, konsentrasaun rekursu hotu hodi bele manán.

Tuir dadus ne’ebé PM Taur haktuir iha diskusaun, solisitasaun Governu ba Xefe Estadu relasiona ho Estadu Emerjénsia kona-ba Coronavírus, tanba hahú mosu iha Xina iha 1 dezembru 2019 no iha 30 jeneiru 2020 Organizasaun Mundiál Saúde (OMS) deklara ezisténsia situasaun estraorinaria ne’ebé fó risku ba saúde públika.

Notísia Relevante: KM Solisita PR Lú Olo Dekreta Estadu Emerjénsia Relasiona ho COVID-19

Xefe Governu esklarese liután, iha 11 marsu 2020 OMS deklara tan katak vírus ne’e hanesan ona pandemia ne’ebé afeta no bele fó ameasa maka’as ba saúde públika.

“To’o agora nasaun hamutuk 198 maka moras ne’e tama ona. Moras ne’e hahú iha Xina no nasaun hotuhotu, inklui Timor-Leste hakfodak no halo esforsu hodi lori fila nia sidadaun sira, maibé infelizmente ita la espera katak vírus ne’e mai tuir nasaun idaidak. Iha 198 País ne’ebé moras ne’e kona ona, hamutuk 438.516 afetadu no 19.656 mak mate, enkuantu 111.912 maka rekopera, iha de’it loron 24 to’o 25 marsu 2020, rejista hamutuk kazu 15.989 no husi totál ne’e 766 mak mate”, PM Taur relata.

Nia observa, daudaun ne’e rejista mate barak liu iha Itália hamutuk 5.476, tuir mai maka España 3.434 tanba iha España sira ninia sistema saúde la aguenta ona no sira tenke hili sé maka husik mate no sé maka salva.

Tuir nia, ne’e hatudu katak nasaun sira ne’ebé iha sistema saúde dezenvolvidu tebes hanesan Itália, sira laiha kondisaun atubele enfrenta situasaun ida-ne’e”, nia akresenta.

“Kuandu kazu importadu ne’e katak ita halo esforsu atu izola hodi labele afeta rai-laran, dala ida afeta ne’e bele multiplika lalais no maka’as loos no tuir previzaun OMS nian hateten katak bainhira Timor-Leste kona karik sei atinje porsentu 10 husi populasaun ka ekivalente 118.364 mak sei infetadu.

“Iha númeru ida-ne’e pursentu 80 korresponde 94.691 mak presiza kuidadu domisiliáriu, katak tenke hela iha uma. Pursentu 15 korresponde 17.755 mak tenke presiza internamentu iha óspital, enkuantu pursentu 5 mak korresponde 5.918 maka presiza kuidadu intensivu”, nia adianta.

Enkuantu iha Timor-Leste rasik rejista ona kazu ida no Vise-Ministra Saúde, Élia António de Araújo  dos Reis Amaral foin aviza katak daudaun ne’e iha suspeitu ida iha Munisípiu Manufahi, ne’ebé ema ne’e foin maka mai hosi rai-sorin.

PM Taur reforsa liután, sistema Saúde iha Timor-Leste laiha kondisaun atu simu surtu ne’e, tanba ne’e maka prevensaun tenke maka’as liu no parte seluk agradese ba esforsu Igreza Katólika ne’ebé suspende atividade sira iha fatin-fatin sira iha teritóriu Timór, nune’e mós Ministériu Edukasaun suspende eskola sira tuir rekomendasaun Komisaun Funsaun Públika, Governu despensa funsionáriu sira ladúnn nesesáriu, liliu sira ne’ebé hetan moras lalais no sira ne’ebé saúde ladún di’ak atu sira bele hela iha uma no asegura de’it ema ne’ebé presiza atubele halo atividade sira ne’ebé nasaun presiza kontinua la’o.

“Maibé medida sira ne’e la too, ita presiza prepara-an di’ak liután ita-nia nasaun enfrenta ona risku hanesan funu ita tempu kotuk ita haree ona ninia konsekuénsia oinsá no krize 2006 ita haree oinsá maka ita ninia kapasidade atu jere no oinsá maka ita-nia esforsu atu hakbi’it ita nia-an hodi infrenta situasaun ida ne’e no preparasaun ne’e importante tebes”, dehan PM Taur.

Nune’e, nia afirma kona-ba Estadu Emerjénsia Timor-Leste iha ona esperiénsia, tanba ne’e bainhira Prezidente Repúblika dekreta mós la’ós buat foun, tanba Governu sente katak presiza fó kbiit atubele regula liberdade sirkulasaun ba sidadaun sira.

“Tanba ne’e maka ami (Governu) presiza ita hotu nia apoia atubele enfrenta ameasa no risku ida ne’e”, nia salienta.

Biban ne’e PM Taur refere liután, kona-ba Prezidente Repúblika ninia mensajén ne’ebé hateten momentu ne’ebé di’ak loos atu Timor-Leste sira hamutuk.

“Ita idaidak labele soe ba kotuk tanba momentu ida ne’e úniku tebes, tanba moras mós lahili ita, di’ak liu ita hamutuk atu ita reuni ita nia kbiit, kapasidade no forsa tomak ne’ebé nasaun iha atu enfrenta risku ida ne’ebé sei atinje, tanba la’ós ita de’it ne’ebé responsabilidade boot ba ita nia nasaun. Liuliu ita-nia inan-aman sira, liuliu mós ajente saùde sira, tanba ita hatene funu tropa mak iha oin, maibé forsa ida-ne’e médiku no infermeiru mak iha oin no tuir estatístika katak porsentu ida hosi sira maka mate iha país sira ne’ebé afetadu”, nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here