Hakerek nain, Pe. Placido Teófilo Freitas, SDB.

Tebes ka virus ne’e la tahan ho ambiente manas?

Faktu hatudu katak virus ne’e agora daudaun habelar mós iha nasaun sira ne’ebé moris iha ambiente manas tropikál nian hanesan Indonézia, Filipina, Malázia, Timor, nst. Aleinde ne’e, virus ne’e to’o mós iha Austrália iha período veraun ka manas nian (husi dezembru to’o fevereiru).

Hosi: Pe. Placido Teófilo Freitas, SDB

Virus korona to’o duni ona iha Timor. Ema ida pozitivu tiha ona ho virus ne’e.

Se ita haree lala’ok epidemia virus korona iha Italia (no iha restu europa hanesan iha Fransa, España no Alemaña), iha dinámika ida konstante: kona tiha ema ida ka rua, buat hotu hanesan la’o baibain de’it, maibé liu tiha semana rua ba leten kazu hahú aumenta husi oras ba oras. Moras mai nadodon tama ospitál to’o fatin toba iha ospitál labele akomoda hotu no ema mate lorloron la’ós ida ka rua, maibé 300 ba leten. Ita espera katak buat ne’e la akontese iha Timor!

Entaun virus ne’e perigozu duni? Sim perigozu duni. Tan sa? Tan ne’e virus foun, ema ladauk hatene oinsá atu kura no ladauk koñese didiak ninia hahalok; ladauk iha vasina ba virus ne’e no ita-nia isin mós ladauk iha imunidade hasoru nia.

Maske nia sei foun, tan esperiénsia iha Xina no agora iha Europa, ita hahú deskobre ona informasaun kona-ba virus ne’e. Tuirmai ne’e ha’u hakarak fahe informasaun balun, la’ós ezaustivu no muda husi momentu ida ba momentu seluk, ne’ebé ha’u halibur husi fonte oioin. Hodi koñese virus ne’e ita bele iha konxiénsia kona-ba virus ne’e ninia perigu no ajuda malu atu proteje ita-nia án, ita-nia família, ita-nia sosiedade no rain husi esterminasaun inútil.

Saida mak virus Korona?

Virus Korona mak virus respiratóriu nian ne’ebé bele kauza moras sira hanesan gripe to’o moras respirasaun nian ne’ebé todan. Hanaran korona, tanba virus ne’e ninia superfísiu hanesan koroa. Virus korona baibain prezente iha animál sira hanesan kuda kamelu no niki (morcego) maibé dala ruma liu husi prosesu mutasaun jenétika bele kona ema no da’et iha populasaun ema nia leet.

Virus Korona ne’ebé kona ema iha oin hira?

To’o ohin loron virus korona ne’ebé kona ema iha ona oin hitu. Sira mak: 1) 229E (coronovirus alpha); 2) NL63 (coronavirus alpha); 3) OC43 (coronavirus beta); 4) HKU1 (coronavirus beta); 5) MERS-CoV (coronavirus beta ne’ebé hamosu Middle East respiratory syndrome); 6) SARS-CoV (coronavirus beta ne’ebé hamosu moras Severe acute respiratory syndrome); 7) SARS-CoV-2 (coronavirus beta ne’ebé hamosu moras COVID-19).

MERS-CoV foufoun hetan iha tinan 2012 iha Arábia Saudita. Virus ne’e, iha momentu ne’ebá, da’et ba nasaun hamutuk 25 hodi oho ema na’in 858 husi pasiente ho kazu pozitivu hamutuk na’in 2.498. Nasaun hirak ne’e barak mak hela besik episentru epidemía nian ne’e mak península arábika. SARS-CoV fali mosu iha rai Xina iha novembru 2002 no hamosu epidemía ne’ebé husi tinan 2002 to’o 2003 oho ema hamutuk na’in 775 husi kazu pozitivu na’in 8.098. SARS-CoV-2 mós mosu iha Xina, iha sidade Wuhan, no agora daudaun hamosu epidemía boot ne’ebé to’o momentu ida ne’e (24 marsu 2020) da’et ona ba nasaun hamutuk 188 hodi oho ema hamutuk na’in 18. 582 husi kazu pozitivu na’in 416.774. Lorloron númeru ema ne’ebé kona moras ne’e ka hirak ne’ebé mate tan virus ida ne’e ka nasaun ne’ebé vírus ne’e hahú tama kontinua aumenta.

Naran COVID-19 katak sa? No tan sa hanaran nune’e?

Naran COVID-19 mai husi termu rua: COVID katak Corona (CO) Virus (VI) Disease (D) no 19 ne’ebé hatudu tinan 2019, tinan iha ne’ebé ema hetan moras ne’e.

Tuir lisan tuan, kuandu iha virus ka moras foun ita ka espertu sira hanaran moras ne’e tuir fatin iha ne’ebé mak nia foufoun mosu. Nune’e iha sékulu 19 bainhira moras kólera hahú da’et ba fatfatin to’o iha kontinente europeu, moras ne’e ema hanaran “the Asiatic cholera” tanba hahú iha “Delta Gange” (teritóriu india nian). No iha ita-nia tempu, moras Ebola (Ebola virus diseases – EVD) hanaran nune’e tanba mosu foufoun iha aldeia ida (iha nasaun Kenya) ne’ebé mak hela besik mota ida naran Ebola, iha ne’ebé ema hetan virus ne’e. Tan ne’e bainhira moras COVID-19 mosu, ema foufoun bolu nia ho naran Wuhan coronavirus disease, tanba iha fatin ida ne’e duni, Wuhan, mak primeira vez ema deskobre ezisténsia moras ida ne’e nian.

Maibé istória hanorin katak hanaran moras ida ho naran fatin iha ne’ebé mak moras ne’e foufoun deskobre kria konseguénsia negativa ba fatin ne’e no ba populasaun husi fatin refere. Konseguénsia negativa sira ne’e mak hanesan diskrimisaun no stigmatizasaun hasoru ema ka populasaun husi fatin ne’ebá. Tan ne’e organizasaun mundiál saude nian (OMS ka WHO) deklara atu labele uza tan fatin hodi hanaran virus ka moras foun. Ho razaun ida ne’e mak bainhira autoridade Xina nian notifika katak sira hetan virus foun husi família virus korona nian iha sidade Wuhan (provínsia Hubei – Xina sentrál), iha 9 janeiru 2020 OMS provizoriamente bolu virus foun ne’e: 2019-nCoV. Hafoin fó naran ufisiál: SARS-CoV-2. Iha 11 fevereiru 2020, OMS hanaran moras ne’ebé mak mai husi virus SARS-CoV-2 nu’udar COVID-19. Entaun: SARS-CoV-2 refere ba virus no COVID-19 refere ba moras ne’ebé mak virus ne’e hamosu.

Saida lós mak síntomu husi COVID-19?

Moras COVID-19 iha síntomu hanesan moras influenza (ka gripe) baibain: isin manas, inus been turu, mear, kakorok moras, ulun moras, dala ruma akompaña ho diareia, susar atu dada iis, no iha kazu grave hamosu bronkite (ou pneumonia).

Se nune’e oinsá hatene katak hetan ona moras COVID-19?

Dalan atu bele detekta se iha moras ne’e ka lae mak liu husi ezame diagnóstiku laboratoriál ne’ebé analiza amostra ida husi sekresaun nasál ka kakorok pasiente nian. Bele mós liu husi ezame raan nian iha laboratóriu. Husi ezame sira ne’e mak bele estabelese loloos se ema ida negativu, katak lahetan virus SARS-CoV-S, ka pozitivu, katak hetan duni virus ne’e. Pasiente ne’ebé pozitivu ona bele mós sintomátiku, katak nia hatudu síntomu sira moras ne’e nian, bele mós asintomátiku, katak nia isin di’ak hela no lahatudu síntomu sira.

Durante epidemía iha Xina, Alibaba Damo Academy konsege dezenvolve aparellu diagnóstiku ida ho sistema Intelijénsia artifisiál (AI – Artificial Intelligence) ne’ebé bele detekta lalais de’it moras korona iha tempu badak nia laran kompara ho ezame diagnóstiku laboratoriál tradisionál ne’ebé han tempu naruk. Sistema ne’e koko duni iha ospitál foun Qiboshan iha Zhengzhou (provínsia Henan) ho tasu susesu nian to’o 96%. Infelizmente agora laiha ona informasaun kona-ba sistema ida ne’e. No to’o agora sistema ida ne’e ladauk aplika iha nasaun seluk, iha liur Xina.

Periódu inkubasaun virus nian: loron hira?

Periódu inkubasaun katak tempu husi momentu ema iha kontaktu ho virus to’o momentu síntomu sira hahú manifesta án mak loron 2 to’o 14. Nune’e bainhira ema hahú kona virus korona, la moras kedas. Liu tiha loron rua ka dala barak liu tiha loron 14 (signifika semana rua tiha) mak hahú sente moras no esperimenta síntomu sira moras korona nian.

Tebes ka virus ne’e la tahan ho ambiente manas?

Foufoun ema ipnotiza katak virus ne’e la aguenta ho ambiente manas. Maibé ikus-ikus ne’e ema hahú dúvida ho hanoin ida ne’e tanba faktu hatudu katak virus ne’e agora daudaun habelar mós iha nasaun sira ne’ebé moris iha ambiente manas tropikál nian hanesan Indonézia, Filipina, Malázia, Timor, nst. Aleinde ne’e, virus ne’e to’o mós iha Austrália iha período veraun ka manas nian (husi dezembru to’o fevereiru).

Se de’it mak bele hetan moras ne’e?

Ema hotu husi idade nurak to’o otas ona bele hetan moras ne’e; balun nu’udar sintomátiku balun nu’udar asintomátiku. Tuir kategoria otas nian, ema ferik-katuas mak barak hetan moras ne’e. Foinsa’e sira uitoan mak sai vítima. Labarik sira sa menuz lós. Tuir kategoria seksu nian, parese moras ne’e kona barak liu ema mane duké feto.

Oinsá trata moras ne’e?

To’o agora ladauk iha tratamentu espesífiku ba moras ne’e. Ladauk iha vasina no ladauk iha aimoruk atu trata moras ne’e. Maske nune’e tuir esperiénsia iha Xina no iha fatin oioin iha duni aimoruk balun ne’ebé bele uza atu trata moras korona. Aimoruk sira ne’e mak hanesan: Kinina ka Klorokina ( aimoruk ba moras malária ou bee doko), Lopinavir/Rendevir (aimoruk ba infesaun HIV nian), Remdesivir (aimoruk ba Ebola), Avigan (ka Favipiravir – aimoruk husi Japaun ba influenza).

Iha situasaun ne’ebé todan, bainhira pasiente hetan ona difikuldade respiratória ka tama ona iha terapia intensiva, doutor sira tenke uza ventilators ka mákina respirasaun nian, atu bele fornese osíjenu ba ema moras.

Ema bele hetan isin di’ak husi moras korona?

Sim, ema bele hetan isin di’ak maske ladauk iha vasina no aimoruk atu trata moras ne’e.

Oinsá virus ka moras korona ne’e da’et? Liu husi meiuz ida ne’ebé?

Iha modalidade rua transmisaun virus korona nian husi ema ba ema. Primeira modalidade mak liu husi droplets (ka gota iha lian portugés ka been turun ida iha tétun) husi kabén bainhira ema moras mear ka fanin. Segunda modalidade mak liu husi kontaktu direitu (kontaktu fíziku hanesan kaer liman, rein, nsst.) ho ema ne’ebé moras.

Oinsá evita trasmisaun virus ka moras korona?

Konsellu ne’ebé baibain ema ka instituisaun sira sujere mak hirak tuirmai ne’e:

  • Fase liman ho sabaun maiz ou menuz durante 20 segundu (20 seconds). Menuz ida ne’e la efetivu oho no hasae virus husi liman. Se bee no sabaun laiha, entaun uza gel dezinfetante (disinfectant gel) ba liman ho baze alkool 70 % (o 60%) hanesan hand sanitizer ne’ebé faan ho marka oioin iha loja no kios sira. Maibé se produtu sira ne’e la faan ona, ita bele halo mesak. OMS (Organizasaun Mundiál ba Saude) rasik publika ona indikasaun oinsá atu halo mesak produtu sira ne’e iha uma.
  • Hadook án husi ema ne’ebé iha moras respiratóriu nian hodi mantén distánsia metru ida husi nia, liuliu bainhira nia mear ka fanin.
  • Labele kaer ho liman ibun, inus no matan liuliu bainhira ladauk fase liman.
  • Taka inus no ibun bainhira fanin ka mear.
  • Hamoos superfisiu (hanesan meja, odamatan, pavimentu, hariis fatin, nsst.) ho dezinfetante ho baze alkool (75 %) ka kloro. Virus korona bele moris iha superfisiu to’o loron 9.
  • Uza máskara bainhira hetan síntomu sira gripe nian (hanesan mear no fanin beibeik) ka bainhira tenke akompaña eh tau matan ema ne’ebé kona ona moras ne’e.
  • Bolu ka kontaktu númeru verde ne’ebé governu fó liu husi ministériu saúde nian bainhira sente hetan ona síntomu sira moras korona nian ka bainhira fila husi rai liur (iha ne’ebé virus ne’e namkari ona).

Sei iha tan konsellu seluk?

Sim. Aleinde konsellu sira ne’ebé dehan ona iha leten presija tau matan mós ba pontu hirak tuirmai ne’e:Hadook án ka hamenus kontaktu fíziku ho membru família sira ne‘ebé otas 50 ba leten (hanesan ita-nia avó sira) tan sira ne’e mak vulnerável liu ba moras korona. Keta halo be ita, liuliu labarik sira, iha hela moras korona maibé tanba ita asintomátiku (katak virus iha ita-nia isin laran, maibé ita lamoras ka la hatudu síntomu moras nian), liu husi ita-nia kontaktu ho ferik-katuas sira, ita da‘et fali ba sira moras ne’e. Fila ba knua iha momentu ida ne’e, la’ós idea ne’ebé di’ak liu-liu se ita mai husi sidade sira iha ne’ebé moras ne’e da’et ona. Diak liu hela metin iha hela fatin agora duké tau iha perigu laran ita-nia família sira, hirak ne’ebé ita hadomi. Tuir estatístiku, mortalidade ferik-katuas nian husi moras korona aas liu. Hanoin didi’ak ida ne’e!

  • Se governu deside atu ema hotu sulan án iha uma laran, ita presija halo tuir tan ida ne’e mak dalan di’ak liu ne’ebé ita bele halo atu hamenus virus ninia transmisaun nune’e hamenus vítima umana. Ita-nia responsabilidade pesoál proteje la’ós de’it ita-án maibé ema hotu ne’ebé hela besik ita.
  • Iha tempu susar hanesan ne’e, presija sentidu solidariedade nian husi ema hotu. La’os momentu atu fó sala ba malu. La’ós momentu atu hada’u malu aihan, aimoruk no kadeira. Ne’e momentu atu fahe buat oituan ne’ebé ita iha. Momentu atu hamoris fali unidade nasionál no fraternidade.
  • Nu’udar ema sarani, ita koko atu moris tuir Jesus nia hanorin iha tempu kuarezma nian atu: 1) reza; “se ó hakarak harohan karik taka ó-nia odamatan no harohan ba ó-nia Aman iha Lalehan ne’ebé rona ó iha segredu kuartu nian”; 2) pratika karidade; “se ó fó ezmola karik, ó-nia liman karuk labele hatene saída mak ó-nia liman loos halo”; 3) zejun; “ema la moris de’it husi aihan maibé mós husi Maromak nia Liafuan”. (*)

HAKEREK NO HATÁN

Please enter your comment!
Please enter your name here