Ministra Finansa ein ezersísiu, Sara Lobo Brites. Imajen/Egas Cristovão

DILI 26 marsu 2020 (TATOLI) – Ministra Finansa ein ezersísiu, Sara Lobo Brites, informa orsamentu ne’ebé tuir pedidu Governu atu halo levantamentu ba Fundu Petrolíferu ho montante millaun $250, hodi reforsa kaixa tezouru, la’ós atu responde ba situasaun pandemia COVID-19, ekonomia jéral no rekuperasaun sira.

Pedidu ne’e, daudaun iha hela Parlamentu Nasionál (PN) no ninia pedidu diskusaun ho karatér urjénsia pasa ona ho votu unanimidade, maske nune’e seidauk hatene bainhira maka PN hahú diskusaun ba asuntu ne’e.

“Osan millaun $250 ne’ebé hetan ona aprovasaun ba karatér urjensia ne’e ba de’it reforsa kaixa tezouru. Osan atu halo intervensaun ba COVID-19, ekonomia jéral no ninia rekuperasaun ne’e seidauk deskute”, informa Ministra Sara Lobo Brites ba Agência Tatoli iha PN, kinta ne’e.

Kona-ba osan ne’ebé atu halo intervensaun ba COVID-19, ekonomia jéral no rekuperasaun ne’e seidauk deskute, maibé sei diskute iha tempu badak, iha Komisaun C ne’ebé trata asuntu Finansa Públika, tanba presiza mós informasaun husi Banku Central atubele tau hamutuk informasaun, hafoin aprezenta filafali iha PN bainhira debate iha levantamentu Fundu Petrolíferu ho karatér urjente.

Tuir previzaun Ministériu Finansa (MF) katak verba ho valór millaun $250 ne’e ba ezekusaun fulan, maibé kuandu COVID-19 ne’e mak to’o faze ida deside Estadu Emerjénsia maka atividade barak maka sei para no Governu sei konsentra de’it ba situasaun COVID-19 ninian, tanba ne’e fundu refere sei sufisiente to’o fulan-outubru 2020.

“Ita espera ita nia lider polítika bele halo desizaun lalais atubele aprezenta Orsamentu Jerál Estadu (OJE) ba iha Parlamentu, maibé ida-ne’e ita laiha serteza tanba ne’e kompeténsia nai-ulun sira nian. Maibé lei mak fó dalan katak bainhira saldo tezouru kuandu kiik, maka tenke mai filafali ba Parlamentu atu husu levantamentu”, governante ne’e realsa.

Antes ne’e, Ministra Sara esplika ba reprezentante povu sira katak, iha jeneiru no fevereiru Governu fixa ona orsamentu duodésimu ba kada fulan hamutuk millaun $116, maibé iha fulan-rua ne’e ezekuta de’it pur volta porsentu 46 iha janeiru no porsentu 44 fevereiru, enkuantu iha marsu fixa nafatin montante ne’ebé hanesan.

Nune’e iha janeiru, Governu hahú ho saldo hosi tinan kotuk (2019) nian, pur volta millaun $290 no reseita ne’ebé rekada iha janeiru hamutuk millaun $18, tantu iha fin fevereiru saldo tezouru mantein ho millaun $215.

“Konserteza saldo ne’ebé maka iha sei naton atubele finansia situasaun saida de’it mak nasaun infrenta durante marsu to’o abríl. Tanba ne’e maka iha okaziaun lubuk ida ami informa katak montante ne’ebé fixa millaun $116, hafoin ho situasaun ne’ebé maka hanesan dezastre naturál no Coronavírus ne’ebé maka tenke halo prevensaun, no kombate. Tanba ne’e la’ós de’it iha área saúde nia parte maibé abranze ba iha setór sira seluk ami haree katak iha nesesidade atu halo proposta ruma mai Parlamentu atubele iha ninia kontinuidade iha maiu”, Sara informa.

Nia refere liután, rejime duodésimu iha limitasaun, ne’ebé só aplika um doze avos ne’ebé maka bazeia ba orsamentu 2019 nian despeza ne’ebé karik akontese atu atende situasaun sira ne’ebé nasaun infrenta hela.

“Fonte únika ne’ebé bele rekorre maka rezerva kontijénsia, entretantu rezerva ne’e mós ita iha limite tanba iha 2019 rezerva kontijénsia pur volta millaun $26 entaun bainhira fahe ba kada fulan hetan millaun $2,229”, nia esplika liután

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here