Prezidente Komunidade Xineza Timor-Leste, Kathleen Gonçalves. Imajen Tatoli/Felicidade Ximenes

DILI, 26 marsu 2020 (TATOLI) – Hahú semana kotuk, loja sira ho na’in ema xineza hahú taka sira ninia loja, maske Estadu seidauk deklara Estadu Emerjénsia relasiona ho COVID-19.

Ba kestaun ne’e, Prezidente Asosiasaun Komersiál Komunidade Xineza Timor-oan (AKKXT, sigla portugés), Kathleen Gonçalves, informa razaun úniku ne’ebé maka halo negosiante xineza sira taka sira ninia loja iha Dili tanba atu prevene moras COVID-19 iha Timor-Leste.

“Bazeia ba informasaun ne’ebé ha’u simu husi ita-nia maluk xineza, sira taka atividade negósiu hanesan loja iha Dili laran ho razaun atu halo izolasaun. Tanba Timor-Leste tuir informasaun husi Governu katak iha ona kazu pozitivu ida ba COVID-19”, nia dehan ba Agência Tatoli liuhosi telemóvel, kinta ne’e.

Nia adianta, negosiante xineza sira rekoñese iha kontestu ne’e labele halo kontaktu entre ema ho ema , tanba ne’e sira hanoin di’ak liu taka sira ninia atividade negósiu, nune’e bele prevene vírus ne’e labele alastra tan.

Haree ba rai Xina ne’ebé hetan ona esperiénsia pandemia ba moras Coronavírus rasik, tanba ne’e kuandu hasoru problema ida-ne’e di’ak liu halo izolasaun.

“Husi sira nia aktu ne’e nu’udar meiu ida atu halo  prevensaun, tanba ne’e maka sira taka atividade negósiu”, Kathleen akresenta.

Maske nune’e, Prezidente Komunidade Xineza ne’e husu ba iha komunidade xineza iha Timor-Leste atu labele taka sira ninia loja hotu, tanba kuandu taka hotu maka sei fó impaktu ekonomia ba Timor-Leste, liuliu ba loja sira ne’ebé fa’an nesesidade báziku.

“Ha’u ko’alia ona ho sira no ami pasa informasaun ba malu, nune’e sira hanesan iha funsaun ida atubele kontribui nafatin ba ita-nia ekonómia hodi kontinua la’o. Ha’u husu sira loke sira ninia loja balun no labele taka hotu hodi bele responde ba merkadu no komunidade sira nia nesesidade, liuliu ba ai-han”, nia subliña.

Biban ne’e, nia husu ba loja timor-oan sira  hanesan Lita Store, Dili Mart no seluk tan, tenke kontribui mós ho situasaun sira hanesan agora.

“Kontinua loke sira ninia atividade negósiu,  nune’e bele korresponde ba nesesidade komunidade nian liuliu ba ai-han.

Nia esplika liután, komunidade xineza sira ne’ebé taka sira ninia loja ne’e sei loke fali iha tempu badak nian-laran.

“Sira taka loja ne’e atu kombate vírus liuhosi meiu ida ne’ebé laiha kontaktu fíziku entre ema ho ema, signifika hamenus kotaktu atu prevene-an husi moras Coronavírus”, nia subliña.

Nia rekoñese, tanba Timor-Leste rejista ona kazu pozitivu ida ba vírus ne’e maka labele aumenta tan hodi hadaet ba ema seluk.

“Sira dehan mai ha’u kuandu sira akompaña ita-nia Estadu hamutuk ho povu, iha ona maneira prevensaun di’ak maka sira sei loke fali no sira hateten katak sei taka atividade negósiu provizóriu de’it, hafoin loron 14 sei loke filafali, tanba sira hakarak akompaña situasaun Coronavírus iha Timor-Leste”, Kathleen salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here