Komandante Jerál PNTL, Komisáriu Faustino da Costa. Imajen/Eugénio Pereira

DILI, 26 marsu 2020 (TATOLI)- Komandu Polísia Nasionál Timor-Leste (PNTL) husu deskulpa ba Organizasaun Mundiál Saúde (OMS) relasiona ho deklarasaun falta kuidadu hosi Komandante Operasaun Nasional, Superintendente Xefe Pedro Belo.

Notísia Relevante : PM Taur Husu Deskulpa ba OMS Relasiona ho Deklarasaun Komandante Operasaun PNTL

Aktu ‘fuan boot’ ne’e, Komandante Jerál PNTL, Komisáriu Faustino da Costa, deklara abertu liuhosi konferénsia imprensa, horiseik, ne’ebé akompaña hosi reprezentante-sira OMS nian iha Timor-Leste.

Komandante Operasaun Nasionál PNTL, Superintendente Xefe Pedro Belo, iha segunda (23/03/2020), deklara ba mídia RTTL katak, pandemia Coronavirus  ka COVID-19 hanesan projetu ida hosi Organizasaun Saúde Mundiál (OMS).

Komisáriu Faustino da Costa, lori Komandu PNTL nia-naran hato’o apresiasaun ba servisu OMS nian ne’ebé fó apoiu tebes Estadu Timor-Leste liu-liu Ministériu Saúde hodi  halo prevensaun ba pandemia COVID-19.

“Aproveita oportunidade ne’e hodi Komandu Jerál PNTL hato’o mós deskulpa ba Organizasaun Mundiál Saúde (OMS) karik iha deklarasaun pergunta ruma mosu iha momentu ne’ebá. Ami husu deskulpa. Fiar katak ita sei servisu hamutuk nafatin oinsá haree interese ba povu no nasaun,” hateten Komisáriu Faustino da Costa, liuhosi konferénsia imprensa ne’e.

PNTL servisu hamutuk ho Ministériu Saúde (MS) no OMS  mós halo ona sensibilizasaun kona-ba prevensaun COVID-19 iha Kuartél Jerál PNTL nu’udar parte ida  edukasaun pedagójika kona-ba ba ofisiais sira PNTL nian, oinsá mak prevene COVID-19.

Komisáriu Faustino dehan, Komandu PNTL rasik koopera ona ho OMS hodi servisu hamutuk nafatin haree ba interese nasionál povu no nasaun hodi ajuda malu prevene saúde Timoroan hosi ameasa COVID-19.

“Ami bolu kedas ami nia komandante ne’e koordena ho Organizasaun Saúde Mundiál hodi ko’alia hamutuk para haloos ona buat sira ne’ebé akontese,” tenik nia.

Komandu PNTL prontu no koopera nafatin ho Ministériu Saúde no OMS hodi servisu hamutuk iha kualkér asuntu liu-liu liga ba prevensaun COVID-19.

Aproveita oportunidade ne’e, PNTL apela mós ba membru sira-hotu atu kontinua mantein seguransa másimu ba povu no ajénsia internasionál Organizasaun Nasoins Unidas (ONU) ho korpu diplomátiku sira-ne’ebé hala’o misaun iha Timor-Leste.

Hataan  ba jornalista-sira kona-ba medida  saida maka Komandu PNTL sei foti ba Komandante Pedro Belo, Komisáriu dehan, kestaun ne’e Komandu PNTL sei diskute internalmente.

“Kona-ba medida, ida ne’e desizaun interna komandu nian,” tenik nia.

PNTL Tenke Fuan Boot Rekoñese Servisu OMS

Membru PN husi Bankada FRETILIN, David Dias Ximenes “Mandati”. Imajen/ António Gonçalves

Iha parte seluk, Deputadu Parlamentu Nasionál, David Dias Ximenes “Mandati” husu ba Ministru Defeza no Ministru Interiór interinu, Filomeno da Paixão de Jesus no Komandante Jerál PNTL, Komisáriu Faustino da Costa, tenke ho fuan boot rekoñese servisu OMS nian iha Timor-Leste no husu deskulpa.

David Mandati dehan, prezensa servisu ONU liuhosi OMS, ohin loron, ajuda tebes estadu no povu hodi luta hasoru propagasaun COVID-19. Nune’e husu ba komandante sira bainhira ko’alia liafuan ruma tenke sukat.

“Ha’u nia haree PNTL tenke laran luak no fuan boot husu deskulpa para buat-sira hanesan ne’e ladún di’ak atu labele akontese tan,” Mandati afirma hodi responde Ajénsia Tatoli iha Uma Fukun PN, ohin.

Nia dehan, dala-ruma komandante-sira ko’alia la kuidadu no la hatene halo distinsaun ba servisu ONU nian. Tanba ONU halo misaun akompaña nasaun sira observa sitasaun, polítika, defeza no seguransa, ekonomia inklui asuntu sosiál no saúde importante tebes.

Antes ne’e, Primeiru-Ministru, Taur Matan Ruak, mós husu ona deskulpa ba OMS relasiona ho liafuan la kuidadu ne’ebé fó sai husi Komandante Pedro Belo.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here