Primeiru-Ministru, Taur Matan Ruak, hamutuk ho ninia membru sira iha Parlamentu Nasionál (PN), halo diskusaun kona-ba Estadu Emerjénsia Relasiona ho Covid-19. Imajen Tatoli/ Egas Cristovão

DILI, 26 marsu 2020 (TATOLI)—Bankada Parlamentár Partidu Kmanek Haburas Unidade Nasionál Timor Oan (KHUNTO) husu Governu oferese ekipamentu médiku ka ekipamentu protesaun ba jornalista sira hodi hasoru COVID-19.

Deputadu Bankada Parlamentár KHUNTO, Luis Roberto, fó hanoin katak jornalista sira mós hola-parte iha liña, frente tanba ne’e governu presiza tau atensaun ba ida-ne’e.

“Kuandu buat ne’e akontese, ha’u haree jornalista sira mak sei mate uluk. Tanba ne’e, ha’u husu Governu fasilita ekipamentu protesaun ba jornalista sira tanba povu presiza informasaun kona-ba COVID-19 ne’e,” Deputadu KHUNTO, Luis Roberto, kestiona iha ámbitu debate pedidu estadu emerjénsia, iha plenária, Parlamentu Nasionál, kinta ne’e.

Aleinde ne’e, Deputada PD, Elvina Sousa, ejize ba Governu atu haree ekipamentu protesaun ba médiku, profisionál saúde, seguransa no defeza hodi proteje sira-nia an molok halo tratamentu ba pasiente sira maka deskonfiadu COVID-19.

“Ha’u ejize ba Governu atu haree ekipamentu protesaun ba médiku, profisionál saúde, seguransa no defeza hodi proteje sira-nia an molok halo tratamentu ba pasiente sira maka deskonfiadu COVID-19. Ne’e hanesan funu ida entaun pprofisionál saúde no seguransa sira mak iha liña frente maibé sira presiza ekipamentu protesaun hanesan bala no kilat-musan fasilita halo sira-nia serbisu,” Deputada Elvina Sousa hateten.

Nia husu ba Governu introdúz insentiva ba médiku no profisionál saúde, seguransa no defeza, sentru lojístika nasionál, jornalista sira, protesaun sivíl bainhira situasaun sai sériu ona.

Tuir nia, bainhira situasaun ne’e akontese duni pesoál hirak ne’e mós hola-parte iha liña-oin.

Notísia Relevante: Pozisaun Xefe Bankada Sira Ba Pedidu Estadu Emerjénsia

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here