Logotipu IKS-Kera Sakti

DILI, 26 marsu 2020 (TATOLI) – Organizasaun arte-marsiál IKS.TL (Ikatan Keluarga Silat Timor-Leste) Kera Sakti, sei kolabora ho Komisaun Reguladóra Arte-Marsiál (KRAM) atu bele hetan lejitimidade tuir Lei haruka.

Notísia Relevante : IKS-Kera Sakti Buka Dalan Formaliza-Aan

Prezidente IKS.TL Kera Sakti, Silvestre Xavier Sufa hateten, konferénsia nasionál IKS.TL Kera Sakti, foin lalais ne’e, iha Otél Luz Clarita, Dili, hodi inisia preparasaun hodi hadi’a estatutu no estrutura organizasaun  nian.

Nia informa, hosi parte IKS.TL Kera Sakti prepara hotu ona dokumentu-sira, hanesan estatutu no estrutura organizasaun nian.

“Progresu ba preparasaun dokumentu, ami preparadu hodi hein de’it submete ba KRAM tuir rekizitu-sira,” hateten Prezidente IKS.TL Kera Sakti, Silvestre Xavier Sufa ba Ajénsia Tatoli, via telefone, ohin.

Nia dehan, parte KRAM seidauk fó sai rekizitu ida loloos ba iha organizasaun arte-marsiál sira  out oinsá mak bele ba rejistu, tanba ne’e IKS.TL Kera Sakti sei koopera ho KRAM bainhira KRAM define regulamentu ruma atu organizasaun arte-marsiál-sira kumpre molok hetan legalizasaun hosi Notariadu, Ministériu Justisa.

Antes ne’e mós Sekretáriu Estadu Juventude no Desportu (SEJD), Nelio Isaac Sarmento hateten, depois governu deside reativa grupu arte-marsiál hanesan IKS.TL Kera Sakti, Persaudaraan Setia Hati Terate (PSHT) no Kmanek Ona Rai Klaran (KORK), maka daudaun ne’e SEJD hetan pedidu haree ajuda sira-oinsá mak atu haree estatutu legais.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here