Vise Prezidente Parlamentu Nasionál, Maria Angelina Sarmento. Imajen/Egas Cristovão

DILI, 26 marsu 2020 (TATOLI)—Deputada Bankada Parlamentár Partidu Libertasaun Populár (PLP), Maria Angelina Sarmento Lopez, afirma Governu tenke preparadu ba senáriu at hasoru COVID-19.

Deputada PLP ne’e esplika, lei númeru 3/2008 kona-ba rejime estadu de sítiu no estadu emerjénsia, artigu balun ne’ebé estipula iha lei ida-ne’e situasaun balun la duun relevante ho artigu sira-ne’ebé deskreve tanba estadu de sítiu ka estadu emerjénsia hatuur iha Lei númeru 3/2008 ne’e refleta liu ba situasaun funu ka konflitu polítiku

Maibé ,nia dehan, situasaun ida agora Timor-Leste hasoru ho mos funu ida-ne’ebé mundu tomak atu kombate COVID-19 ninia natureza ne’e iha buat balu ke diferente tenke aplika regra ho rigorozu.

Deputada PLP ne’e fó ezemplu, iha Italia kuandu ema ne’ebé mak la obedese estadu nia desizaun atu lock down no la iha ida mak bele sai hosi uma, bainhira ema ruma movimentu iha li’ur estadu detein sira no ba tuir julgamentu tanba la kumpri desizaun ka polítika estadu nian atu prevene COVID-19.

“Ha’u hakarak hato’o mós ba Governu embora ita iha mak kazu pozitivu ida maibé ita presiza hanoin senáriu iha aat liu ne’ebé Governu presiza prepara-an. Ezemplu ita to’o iha faze ema mate ba Coronavirus hanesan akontese iha Italia, ita-nia maneira atu rezolve funeral ne’e halo nusá, hakoi masal ka sunu,” dehan nia liuhosi plenária, Parlamentu Nasionál, kinta ne’e.

Deputada Maria Angelina hateten, se falta rekursu, entaun presiza orsamentu hira atu responde ba senáriu sira-ne’e.

“Tanba ne’e ita tenke preparadu ba senáriu ida at liu ne’e. Se ita hakoi karik rai Governu identifika ona iha-ne’ebé,” hateten Deputada PLP ne’e.

Notísia Relevante: PN Husu Ministériu Saúde Fó Informasaun Loloos Ba Mídia Kona-ba COVID-19

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here