Primeiru-Ministru, Taur Matan Ruak, hamutuk ho ninia membru sira iha Parlamentu Nasionál (PN), halo diskusaun kona-ba Estadu Emerjénsia Relasiona ho Covid-19. Imajen Tatoli/ Egas Cristovão

DILI, 26 marsu 2020 (TATOLI) – Governu sei kria Gabinete Jestaun Risku, ne’ebé sei lidera diretamente hosi Primeiru-Ministru (PM), Taur Matan Ruak, hodi fó atendimentu ba sidasaun bainhira Prezidente Repúblika dekreta ona Estadu Emerjénsia relasiona ho pandemia COVID-19.

“Daudaun ne’e Governu iha komisaun interministeriál de’it no komisaun téknika ne’ebé liga liu ba preparasaun. Maibé bainhira deklara ona Estadu Emerjénsia maka ita tau ho funsionamentu Gabinete Jestaun Risku no Primeiru-Ministru mak lidera, tanba ne’e medida espesiál lideransa tenke forte atu sira bele kumpre”, hateten PM Taur iha Parlamentu Nasionál (PN), kinta ne’e, hodi responde ba deputadu sira, relasiona ho stock ai-han ba komunidade sira bainhira Timor-Leste iha ona situasaun Estadu Emerjénsia.

Xefe Governu esklarese, bainhira Governu deside atu lockdown (taka Aeroportu, fronteira no portu sira), Governu sei garante ai-han hodi labele falta ba sidadaun.

“Iha País barak, ezemplu hanesan Itália, voluntáriu sira maka ba sosa ba populasaun sira no lori hela sira uma no bainhira sira sai karik forsa ka seguransa sei akompaña”, nia akresenta.

Nune’e, PM Taur relata mós katak hafoin halo avaliasaun ba ekipa Task Force hodi halo prevensaun ba COVID-19, maibé hasoru kedan difikuldade.

“Foin lalais ami halo avaliasaun ida hosi ekipa ne’ebé lidera hosi Doutór Sérgio Lobo, maibé mosu kedan problema boot ida ne’ebé maka presiza lideransa no komunikasaun oinsá maka ordén sai ne’e ema hotu tenke kumpre, tanba povu tenke hatene risku ne’e to’o ona iha ne’ebé? no oinsá ninia komportamentu sidadaun nian iha momentu sira hanesan ne’e. Naturalmente ita tenke reforsa, ne’ebé ha’u hanoin katak ha’u garante”, nia adianta.

Kona-ba stock hahán, PM ne’e informa, relasiona ho fós daudaun ne’e iha tonelada 40.000 no konsume kada-fulan tonelada 11.000, signifika bele aguenta ba fulan-haat.

“Ita sei la taka-an totalmente ba iha mundu tanba daudaun ne’e ami negosia hela atubele mantein voo konetividade husi Singapura, Austrália, inklui nasaun ne’ebé bainhira Timor-Leste presiza sasán sira bele haruka mai”, nia salienta.

Entetantu, durasaun ba Estadu Emerjénsia sei to’o fulan-ida, maibé bainhira haree ba nesesidade maka sei halo estensaun.

“Tuir ita nia konstituisaun ba Estadu Emerjénsia ita husu fulan-ida, tanba ne’e fulan-ida ami aprezenta relatóriu, hafoin bele haree halo estensaun ka lae bainhira iha risku liu maka tenke estende, sé laiha ita para”, nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here