Imajen Espesiál.

DILI, 26 marsu 2020 (TATOLI) – Reitór Institutu Superiór Filozofia no Teolojia (ISFIT), Padre Domingos Alves da Costa, informa ISFIT Fatumeta, Dili adia ninia programa graduasaun dahuluk ne’ebé tuir loloos hala’o iha loron 18 fulan-Abríl tinan-2020, tanba Covid-19.


Nia hatutan desizaun ne’e ISFIT foti bazeia ba karta despasu reitoria númeru 07/R/ISFIT/ADG/III/2020, ne’ebé ofisialmente fó sai iha kuarta loron 25 fulan-marsu tinan 2020.

“Despasu ne’ebé ofisialmente fó sai iha kuarta loron 25 fulan-marsu tinan-2020 hateten, loloos serimónia graduasaun dahuluk ba grau lisensiatura Filozofia no Teolojia realiza iha ISFIT loron 18 fulan-Abril tinan-2020, maibé adia ba loron in-determinadu tanba Coronavirus (COVID’19) ne’ebé oras ne’e invade mundu, hamate ema ua’in be ua’in husi nasaun ba nasaun, inklui tama ona iha Timor Leste,” karta despaisu ne’e hateten.

Tanba ne’e, nia dehan, parte reitoria ISFIT nian, haree husi parte hotu-hotu, liuliu orientasaun husi Organizasaun Mundiál Saúde (OSM) no desizaun lider másimu Igreja Katólika nian hodi suspende misa no orasaun komunitária, ho objetivu presiza duni atu ema ida-idak izola-an iha ida-idak nia fatin.

“Nune’e, Institutu ida ne’e mós hakarak kontribui ba bem komum, di’ak ba ita nia-an, família, sosiedade, uma kreda no ba ita nia nasaun Timor,” karta despaisu ne’e haktuir.

Iha karta despaisu ne’e mós Padre Domingos Alves Husu ba estudante sira atu simu realidade ida ne’e no husu ba estudante ida-idak atu bele kontribui buat di’ak ruma ba ema hotu nia di’ak.

“Favór, kuidadu imi nia-an, kuidadu mós ema seluk liuhosi halo distânsia ba malu. Maromak fó bensa mai ita hotu,” Padre Domingos fó lia menon.

Entretantu, kandidatu estudante finalisa ne’ebé preparadu atu simu graduasaun iha Institutu Superiór Filozofia no Teolojia (ISFIT) hamutuk ema na’in 96, kompostu husi Departamentu Filozofia na’in 62 no Departamentu Teolojia na’in 34.

Jornalista : Cipriano Colo

Editór    : Cancio Ximenes

HAKEREK NO HATÁN

Please enter your comment!
Please enter your name here