SEJD Nelio Isaac Sarmento (faru mutin), PM Taur Matan Ruak, SEFOPE Julião da Silva ho responsavél masimu IKS.TL Kera Sakti, Silvestre Sufa, halo sorumutuk ho membru IKS.TL Kera Sakti iha salaun otél Luz Clarita, Dili, sabádu (21/03/2020). Imajen/Nelson de Sousa

DILI, 26 marsu 2020 (TATOLI) – Prezidente IKS.TL (Ikatan Keluarga Silat Timor-Leste) Kera Sakti, Silvestre Xavier Sufa, konsidera, desizaun governu nian ne’ebé halo revogasaun ba rezolusaun governu númeru 16/2013, 10 jullu, hodi reativa arte-marsiál atu bele ezerse fali-inia funsaun desportiva.

Notísia Relevante : IKS.TL Kera Sakti Sei Kolabora ho KRAM Atu Hetan Lejitimidade

“Ba ami mak ne’e, desizaun governu nian ne’e, di’ak tebes no hanesan organizasaun arte-marsiál Kera Sakti hodi bele ezerse fali nia funsaun hanesan desportiva ida,” hateten Prezidente IKS.TL Kera Sakti, Silvestre Xavier Sufa, hodi responde Ajénsia Tatoli, via telefone.

Dirijente másimu IKS.TL Kera Sakti ne’e hateten, maske rezolusaun governu ne’e revoga ona, maibé atividade treinu seidauk bele la’o tanba presiza kumpre nafatin lei kona-ba arma branka númeru 5/2017 no rekizitu sira-ne’ebé governu kria atu bele hetan lejitimidade hosi Notariadu iha Ministériu Justisa.

Prezidente IKS.TL Kera Sakti, Silvestre Xavier Sufa mós hateten, iha artigu balun iha lei númeru 5/2017 ne’ebé mensiona kona-ba bandu utilizasaun atributu arte-marsiál, presiza mós governu bele halo proposta hodi haruka ba Parlamentu Nasionál atu halo amandamentu ba artigu refere.

Depois governu deside reativa arte-marsiál, parte IKS.TL Kera Sakti hahú halo preparativus kontinua hodi kolabora ho parte-sira atu oinsá kumpre rekizitu legais sira nasaun nian.

Hatán kona-ba ho revogasaun ba rezolusaun reativa arte-marsiál iha terrenu membru GAM-sira komesa utiliza ona atributu arte-marsiál ida ne’e sai preokupasaun bele provoka  konflitu entre membru GAM, Silvestre Xavier Sufa, lia-tun dehan, utiliza atributu ne’e viola lei no krime ne’ebé lei arma branka númeru 5/2017 vigora hela tanba ne’e kompeténsia autoridade seguransa bele ka’er hodi prosesa, maibé ida ne’e halai ba indivíduu la’ós organizasaun.

“Kuandu funsiona ona liu-liu iha organizasaun nia laran regra interna tenke forte ezemplu hanesan treinadór (pelatih) ne’e tenke iha lisensa no fatin treinu tenke hetan autorizasaun. Labele loke arbiru,”  hateten Silvestre Sufa.

Nia hatutan, nune’e mós utilizasaun atributu, só utiliza de’it  iha fatin treinu, maibé sai hosi treinu iha fatin públiku sei la uza arbiru ho regra sira seluk tan atu membru hotu bele kumpre.

“Presiza dekretu lei balun atu regulariza indivíduu membru arte-marsiál  balun mak viola hodi uza atributu arbiru tenke hetan sansaun no tenke atua direita hosi autoridade seguransa,”  Silvestre Sufa tenik.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here